الشاعر عبدالعزيز بن حمد البادي والشاعر ناصر بن سرحان الشيباني ،، انا مانيب في طرقة الحجاج سرقان

تويتر / @ABDULAZIZ_ALBAD
تك توك /@ abdulaziz_albadi
10 # محاورة { أنا ما نيب في طرقة الحجاج سرقان } بين الشاعرين { عبدالعزيز البادي ** ناصر الشيباني }
الأبيات
عبدالعزيز البادي
سلامي عد ما ناظ براق بالامزان
برديه وفيه لها روحه وجيه
دعيت أو جيت والعب عليها يا بن سرحان
مداريجه تمشى على هذي وذيه
ناصر الشيباني
سلمت من العنا يا مغني زين الألحان
وأنا عيني من الناس يا الصاحب شقيه
ليا بانت حروف القرايه زان ما زان
ترى الذمات يا صاحبي دايم بريه
عبدالعزيز البادي
عسى ما باس يا الي شكى ميلات الأزمان
أنا خابرك باتع ولك نفس قويه
عزيب الجوف وش دخله دار ابن رمان
مناويك أخلفت والليالي خرمسيه
ناصر الشيباني
انا كيف اشتكي منك يا طير بعودان
وانا لو طالت امثال والله ما عليه
تحيزم واحتزم لا تقايسها بالأكفان
ترى الدنيا على صاحبك دايم رخيه
عبدالعزيز البادي
عميلي ما يعرف الضحى والا مسيان
غدت به نية الوهم والنية مطية
انا واياهـ في ذا المكان اصحاب واخوان
ولكن ما استودهـ يفرّط من يديه
ناصر الشيباني
عميلك حيةٍ تقرص الساري بنيبان
وعلّة صاحبي يا جماعه داخليه
انا ابني وانت تبني قصور بغير بيبان
وانا ما همني فالنظر عود النصيه
عبدالعزيز البادي
معي للحيه اللي تسيّر رمح وقران
تطوى في ذرى الغار ليّه فوق ليّه
ولا حنّا الخبيثة عقب ما بان ما بان
فلاكن خلّها يا السنافي عنقريه
ناصر الشيباني
جملنا يا جملنا تشدد يا كحيلان
ضعيّف والضعيّف يغر من الرعية
تبى تقرا وانا قاريٍ خاتم سليمان
وذيب ناشته بندقي تكسر لحيه
عبدالعزيز البادي
ندرجها على اللي ضلوعه عوج ومتان
لما انه ينقل الحمل من شمسه لفيه
تعوذ يا كثير الخطا من كل شيطان
ترى حسناك ما هيب تمحى عنك سيّه
ناصر الشيباني
عسى ربي يعوضك بعد حلوات الألبان
كليت اللقمة اللي بها حرقه ونيه
انا قد شبت فالملعبة يا طير برمان
تحيزم واحتزم لين تدري بالصبيه
عبدالعزيز البادي
تنطع بالمرارهـ وبطنك فيه رمان
ولوحة نمرتك له حروف داخليه
انا خابرك حطيت يمة حضن دكان
واهل جو الدفينة وراك امخامريه
ناصر الشيباني
انا من قطف رمانكم شبعان شبعان
عسى ربي يحشمك يا محشم خويه
تعيرني ومثلك يجر طوال الأرسان
وانا ماني محيزر ومعك امحيزريه
عبدالعزيز البادي
تقول الوقت داخل لكن ما اوحيت الاذان
أثرك الغر بالعرف ما لك مخبريه
انا ما نيب في طرقة الحجاج سرقان
ولد شيبان ذي سنته بالجاهليه

[@5w10]

الله يرحم الشاعر ناصر بن سرحان الشيباني شاعر من عمالقة الشعر في نجد لكنه مظلوم اعلامياً كان يهابه كبار الشعار ويخشون مواجهته حتى اشرطته اخفيت ولا يظهر منها القليل بعد التقطيع والحذف

[@امفهود-خ5د]

الله يرحمهم ويغفر لهم ويتجاوز عنهم

[@ADBULAZIZ_ALBADI]

اللهم آمين ،،،

[@بلادي-ح2ت]

الله يرحمهم طاروق كايف

[@الأجدل-س3ق]

الله يرحم ناصر بن سرحان اتذكر عندنا بالحجاز يقولون مابه شعار في نجد غير احمد الناصر وناصر بن سرحان شعار كبار

[@Ahmad-c9k9j]

ويرحم الله عزيز البادي

[@الأجدل-س3ق]

@@Ahmad-c9k9j ونعم الله يرحمه ويغفرله

[@ابوعبدالملكابوعبدالملك-د9ه]

الشاعر عبدالعزيز بن حمد البادي من مواليد عنيزة عام 1338 وتوفي في حادث سير بتاريخ 19 صفر عام 1402 ، وهو من كبار شعراء المحاورة على مستوى الوطن وحاور كبار الشعراء في هذا الفن

[@ADBULAZIZ_ALBADI]

جزاك الله خير تنويه الشاعر / عبدالعزيز حمد البادي توفي بتاريخ ١٩ ربيع الأول ١٤٠٢هـ .

[@uuitiu]

يعطيك العافيه والله يرحمة ويغفر له ويسكنه فسيح جناته ويرحم كل مسلم

[@زايدالأسمري-س4ك]

رحمه الله وغفر له واسكنه فسيح جناته

[@ابوسفرالعتيبي]

المعنى عن ايش

[@امفهود-خ5د]

ابي القصيده كامله اللي يعرفها ينزلها كامله ابي رد الشيباني على اخر بيت

[@ADBULAZIZ_ALBADI]

@@امفهود-خ5د هذا المتوفر بالشريط ونشكر من يزودنا بالمحاورة كاملة

[@شيهانال-ت2م]

ضعيف ضعيف والضعيف يغر من الرعيه (الشيباني) ونا من قطف رمانكم شبعان شبعان خبث شعري مقيت ولوحه نمرتك له حروف داخلية (لبادي) الشعر دائمآ مايخلو من الهمز واللمز والاسقاطات من قديم الزمان يلومون شعراء اليوم وهو امتداد للماضي ليس الا

[@الربيع-ض2د]

البادي حربي ولا مطيري ولا وشو ؟

[@ADBULAZIZ_ALBADI]

البادي - من التومان من شمر

[@الربيع-ض2د]

@@ADBULAZIZ_ALBADI الف ونعم

[@ADBULAZIZ_ALBADI]

@@الربيع-ض2دماعليك زود ،،،

[@شيهانال-ت2م]

الله يرحمهم جميعًا ويعفى عنهم عطنا محاوراته لو تكرمت مع الشاعر سعيد بن صالح الاحمري في الشمال

[@امفهود-خ5د]

نبي التكمله وين القاها الله يعافيكم