ليه تدخل تمريض بسبب المميزات اللى مش هتلاقيها فى معظم الكليات|سلسلة_الكليات

#سلسلة_تعريف_الكليات
#كلية_التمريض
#ثانوية_عامة_2023
《كلية تمريض》
تمريض من مرّض يعني داوَى
تخيل لما مهنتك تبقى إنك بتداوي الناس وبتساعدهم يتخلصوا من الوجع ، يبقى تستاهل ولا متستاهلش؟ 🤔
- كلية تمريض كلية مهدور حقها وسط الكليات كلها ودايما المقارنه بينها وبين طب مبتبقاش عادلة😕
- مع إن لو حسبنا الامور بشكل صح بعيد عن العادات والتقاليد والمجموع والتنسيق فهتلاقي إن كلية زي دي من غيرها مكنش هيبقى في مستشفي ولا دكاترة بردو
- مبدأيا كده الكلية موجودة في معظم المحافطات تقريبا زي (القاهرة واسكندرية وطنطا والمنصورة وعين شمس و اسيوط والمنيا وبني سويف وسوهاج والفيوم وقناة السويس وغيره)
📌 نظام الكلية
- الكلية 5 سنين (4 سنين دراسه وسنه امتياز)
- واغلبها بتبقي عمليه، يعني مطلوب منك حضور كل يوم وبتنزل المستشفي وبتشوف حالات وبتتعامل معاها 🤗
- نظام الكلية بيخنلف من جامعة للتانيه يعني عندك جامعات ماشين بنظام الساعات المعتمده وال اكيد ليه مميزاته وعيوبه وفيه كليات تانيه ماشيه بنظام تاني
- ليها نظام قدرات وبتمتحنوا على ٣ اقسام
- اللغة وبيقيسوا مستوى اللغة عندك
- انترفيو مع الدكتور وفيها بيسألوك عن لو حصل موقف معين هتتصرف ازاي
- معلومات عامة
📌 المواد
بالنسبة للمواد فيها بتتقسم قسمين :
مواد تمريض 《يعني في صميم المجال》
ومواد غير تمريض 《يعني المواد الي معظم الكليات الطبيه بتاخدها》
- فمواد تمريض في مادة اسمها أساسيات تمريض معاك كل سنة و لو شلتها بتشيل السنة كلها يا حلو حتى لو مش شايل مواد غيرها ودا من العيوب طبعا 👀
- - والمواد ال مش تبع تمريض بتبقي زي مواد صيدله ال هما 《فارما وبايو》ومواد علاج طبيعي وطب بشري 《وفسيولوجي وتشريح وهستولوجي وميكرو》وغيرهم كتير
- وبتدرس طول الاربع سنين التخصصات والاقسام الي بتلاقيها بعد كده لما تيجي تشتغل 《زي باطنة وجراحه و نساء وتوليد وطوارئ وطب شرعي واطفال وعظام ورمد》🏥
- خامس سنة بقا بتبقي سنة الامتياز مش بتكون دراسة دي بتكون تدريب عملي في المستشفي علي كل حاجة أخدتها في الكلية وبيقي ليك مرتب تحت اسم "مكافأة" 🤗
- وممكن تستلم الامتياز علي طول بعد ما النتيجه تظهر او ممكن تأجله وساعتها لو اجلته تقدر تشتغل في اي مستشفي خاصه والمرتب فيها بيقي حلو وجدا وطلبة الامتياز بيقوا مطلوبين 😎
📌 التكليف
- بعد الامتياز على طول هيبقى ليك تكليف او بيجيلك جواب تعيين بمعني اصح في المستشفيات الحكومي وده بيقى شغلك الاساسي بعد كده وبتتثبت في المستشفى كأخصائي تمريض وممكن تشتغل اخصائي في اي قسم مش شرط قسم معين 🙏
📌التخرج
- الكلية عموما بتتطلع منها بمؤهل عالي "بكالوريوس تمريض" والتعيين والتكليف بيجيلك كأخصائي تمريض مش ممرض بمعنى انك بتكون مشرف على طقم التمريض في قسم من أقسام المستشفى اي قسم بقى من ال كنت بتدرسهم طول الاربع سنين 《زي باطنة او جراحة او اطفال او اي حاجه》فانت بتبقي مشرف علي الطقم الممرضين الي في القسم ده الي بيبقوا متخرجين من معهد او مدرسه او اكاديميه تمريض 😌
📌 بعد التخرج
- هنلاقي ناس بتقف لحد هنا وتقولك انا شغال وبقبض بس فيه ناس مش هتكتفي بكدا وهتكمل
- والناس ال بتكمل ديه بيقي قدامها مليون سكه والتانيه تكمل فيها 🥳
- دبلومة تمريض عسكري وبتبقي بعد الامتياز وعباره عن ٦ شهور .. وبيقي قدامك عموما الجيش او الشرطه علي حسب ما تحب .. وبعدها بتشتغل في مستشفيات الجيش او الشرطه
- الدبلومة
- دبلومة تحاليل طبيه وبعدها تقدر مع نفسك تفتح معمل تحاليل
- او دبلومه زي مكافحه العدوي infection control وبتبقي ٦ شهور او دبل
- او دبلومة الاداره او الجوده
- الماجستير وبتبقي ٣ سنين بتدرس فيه فرع من فروع التمريض وبيديك فرصه انك تدرس في الكلية ويزودلك في مكانتك ومرتبك لو فكرت تسافر
- الزمالة
- و دي دراسة بتعملها لما تخلص الكلية:
- زي زماله المعهد البريطاني
- او زمالة مكافحة العدوى بتبقي مدتها 3 سنين وبعدها بتكون استشاري مكافحة عدوى
- او زمالة المعلوماتية الصحية وبتبقي سنتين و بتتخرج منها أخصائي معلوماتية صحية و بيكون مجالك في الكمبيوتر
- - information technology جوه في المستشفي
وفيه زمالة الإرواء قلبي ودي بتتخرج منها أخصائي إرواء القلب ودا بيقبى موجود في عمليات القلب المفتوح لما بيوقفوا القلب بيشغل جهاز القلب الصناعي .. ومهمته بتبقي تقيله لانه هو الي بيدي الاوامر ولازم يبقي عارف ازي يتعامل مع الجهاز كويس 🤝
وفيه زمالات تانيه زي زماله الاطفال والتخدير
📌 طيب ايه الفرق عموما بين التمريض والطب ✍؟
- الفرق إن الدكتور بيشخص الحالة وبيوصف العلاج بس اخصائي التمريض بيراجع العلاج والتشخيص وبيقي مسؤول عن كل طقم الممرضين عشان كده لازم يبقي فاهم في كل تفصيله في شغل الممرضين عشان لو فيه غلط يقدر يلحقه ويحاسب عليه الممرض😀
يعني عندك مثال👀
- اخصائي التمريض في العمليات والتعقيم بيقي نوعين النوع الأول ده بيساعد الدكتور أثناء العملية ليس إلا والنوع التاني مسؤول عن تجهيز اوضه العمليات وتعقيمها وتعقيم الأدوات الي فيها وتجهيز المريض يعني بيتعب شوية في شغله
- - وزي ما قلنا ان التمريض بيدرس نفس مواد طب بس على اصغر شويه ومش بتعمق زي طب زي ما بالظبط بتوع طب بيدوسوا مواد تمريض على اصغر شويه
📌ختاما
- الكلية مستقبلها كويس جدًا لانك بتتخرج و تشتغل علي طول وتتثبت في شغل تبع الحكومه دا غير انك ممكن تنزل تشتغل او تتدرب وانت بتدرس عادي في اي مستشفي خاصه 💉
- - وبإذن الله إذا أخدت قرارك ودخلت الكلية دي لازم تقدر قيمتك وقيمة العمل ال بتعمله و الموضوع مش سهل أوي ولا صعب مستحيل لا هو ممكن جدا بالمجهود والسعي.
#كلية_التمريض
بالتوفيق ليكم

[@ranooshranoosh9720]

أنا جايه من كلية تمريض، أنا دفعة السنه اللي فاتت اقولكم إن الكليه جميله والمجال كويس جداََ واللي عنده فرصه يدخلها ميضيعهاش

[@samarhelal5694]

هى ليها تكليف بعد الدراسه

[@ranooshranoosh9720]

@@samarhelal5694 كليه تمريض حالياََ ليها تكليف، بالنسبه للقرار اللي كان انتشر فدا كان لكل كليات القطاع الطبي إن التكليف اتلغي، لكن أغلب الاراء بتقول إنه مش هيتلغي على طب بشري وتمريض لأن فيهم عجز شديد جداََ، لنفترض إن فعلاََ اتلغي في مستشفيات برايفيت كتير تقدري تشتغلي في أي واحده من وأنتِ في الكليه كمان وتكسبي فلوس كويسه جداََ إن شاء الله، إلى جانب الدبلومات والزمالات المتاحه للكليه اللي مستر أحمد ذكرهم في الفيديو ❤️

[@user-ot1gu8ec7k]

من فضلك الدراسه صعبه زى طب فعلا

[@ranooshranoosh9720]

@@user-ot1gu8ec7k من ناحية الكليه صعبه فهي صعبه فعلاََ، بناخد مواد من طب وصيدله إلى جانب المواد التمريضيه طبعاََ الكليه كلها إنجليزي وعمليه وسكاشن وبعدها محاضرات ، لكن لو كنتي جايبه مجموعها في الثانويه بمجهودك و ذاكرتي كويس جداََ في الكليه هتقدرى تمشي فيها إن شاء الله، وعايزه اقولك إن مفيش كليه سهله وخصوصاََ الكليات الطبيه وتمريض كليه طبيه فلازم تكوني متوقعه مستوى صعوبتها

[@LobnaMohammed-tw8zf]

كنت عايزه اعرف هو لازم شرط الحصول علي 75٪انجليزين

[@manar1512]

كله فجأة حب تمريض😂😂😂 خفو شوية يا جماعة هتعلوا التنسيق عايزة ادخلها😂😂😂😂😂 حرفيا كل الناس بتتكلم عنها وحباها 😂😂😂❤

[@ahmedeltiaby]

هههههههه تمنى الخير لغيرك 😂😂

[@manar1512]

@@ahmedeltiaby معنديش مشكلة ندخلها كلنا والله 😂😂😂 بس أصل دي أخر أمل ليا في دراسة حاجة مياله ليها ربنا يكتبلنا الخير كلنا 💗 احنا دفعة علي الله حكايتها 😂😂

[@amanymohamed8302]

اه والله فعلا انا جيبه 86,34 وخايفه مدخلش لان محافظتي المنصوره بيبقي تنسيقها عالي جدااا

[@ranaelsayed9050]

@@amanymohamed8302 انا ٨٥ ونص وعندى امل الحق المنصورة لانها محافظتى بردو ف ان شاءلله مش هتعلي عن كدا تفائلي😂😂

[@user-ng9cm8if8l]

@@amanymohamed8302 ان شاء في محافظات تانيه عادي 😍

[@Fatma502]

انا مكنتش حابة ادخل كلية التمريض عشان الكلام إللى كنت بسمعه عليها بس لما دخلتها لقيت عكس الكلام ده من الكليات الممتعة جدا وكفاية بس انك تشوف المريض بيدعي ليكى مش تسمعوا كلام الناس السلبي شكرا جدا لحضرتك بأذن الله حضرتك هتكون حاجة مشرفة ان شاء الله حضرتك من الناس اللي فعلا بتعافر وطموحين جدا افتكر لما كنت حضرتك بتشجعنا علي المذاكرة والتحديات جزاك الله خيرا ودى قناتى إللى بأذن الله هنزل عليها شرح البايو والتغذية للتمريض وكمان شرح احياء للثانوية العامه

[@user-wg8cs8wb7u]

انتي ف سنه كام كلية تمريض؟

[@Fatma502]

@@user-wg8cs8wb7u فرقة تانية

[@TitoTito-or3hw]

انا انشاء الله رايح سنة تانية تمريض واحب اقلك انك انسان محترم جدا وبشكرك جدا جدا ❤❤❤ على الفيديوهات اللى بتفيدنا بيها وكلامك من دهب فعلا ❤❤

[@user-ko7yc4cr3l]

ياريت تعملنا فيديو عن ازاي اتخلى عن جنسية مصرية دي؟ كل ناس فخورة بكونها مصريين آلا انا مش عارف لية يمكن علشان ظلم او عدم حرية تعبير عن راي فى سياسة او تعليم او متعرفش تجيب حقك، ازاي بقى فخور بلد زي دي

[@marwamar2896]

لو سمحت ممكن تتكلم عن معهد فني تمريض ومل ما يخصه وازاي اقدر اكمل كلية تمريض بعدها وايه فرص الشغل

[@maihekal9798]

بعد إذن حضرتك ممكن توضح الفرق بين قسم biotechnology و قسم biophysics و ايه الأحسن لواحد كان بيميل أكثر للقسم الطبى بس المجموع مجبش و حضرتك كنت فى كلية علوم جامعة ايه و شكرا مقدما🙏🙏🙏

[@aliaaelsayed6443]

اتكلم عن المعهد الفنى الصحى بس بسرعة ربنا يكرمك❤

[@nournajib1944]

79 % الحق تمريض جامعة السويس بالإسماعيلية 🙂

[@3bd_elrahman]

اه

[@freearabicpalestine1948]

​@@3bd_elrahmanكلية تمريض؟ ولا معهد تمريض؟ وهل معلوماتك دى صحيحة علشان أخوك خايف جداً...

[@esraamohamed462]

كانت من اربعه وسبعين وحاجه من عشره السنه اللي فاتت واحتمال التنسيق ينزل السنادي

[@freearabicpalestine1948]

@@esraamohamed462 طيب ٧٩ ممكن تلحق تمريض فى محافظات إيه تانى غير إسماعيلية؟ يعنى ممكن فى الشرقية؟

[@esraamohamed462]

@@freearabicpalestine1948 انا جايبه ٧٨٪ ومن الشرقيه بردوا م هلحق الزقازيق فلقيت اسماعيليه أقرب حاجه ليا غالبا

[@esraaabdelsamei1168]

٦٣،٢٩ الحق معهد تمريض ؟ 😢 انا شايفه ان الاقبال زياده اوي عليها بسبب الغاء القدرات 😢

[@user-ev7jc1oq5n]

ممكن لو سمحت تتكلم عن كلية علوم و بالذات تكلمنا عن قسم التكنولوجيا الحيوية وقسم الفزياء الطبية وشكرا لحضرتك

[@ashraf77997]

يسطا كليتك دى المره المليون اللى اطلب منك بالتفصيل

[@ahmedeltiaby]

والله قريب متقلقش بس الفكرة هصور مع دكتور رئيس القسم

[@hasnaa993]

هي ايه كليته

[@أسماءمحمد-خ6ذ]

الحمد لله و الشكر الله في كلية تمريض و أفتخر🥰🥰🥰

[@crz11uu]

شكد معدلج ?

[@أسماءمحمد-خ6ذ]

جامعه المنصورة

[@naremanel-sayed7283]

ممكن تتكلم عن معهد فنى صحى 😔 وهل صحيح أن على سنة ٢٥ مش هيعينوا غير لو محتاجين 🤔💔

[@hendmahmoud113]

ممكن ترد عليا لو سمحت انو احسن معهد فني صحي القوات المسلحه ولا المعهد الصحي العادي يعادل التمريض العسكري والتمريض العادي

[@عبدالرحمنمصطفى-خ7م]

انا الكليه وقفت معايا على 2% وجالى معهد فنى تمريض ادخله ولا لاء كان نفسي جدا فى الكليه ومش عايزه ادخل حاجه وخلاص 😢😢😢 والنبى حد يساعدني لانى منهارة ومش عارفه افكر خايفه احول على كليه تانيه اندم ومش عارفه اعمل ايه 😢😢

[@user-we9dm4pp1z]

اشكد معدلك

[@gehadelsayed3637]

%80.12 الحق تمريض علشان بيقولوا الغاء القدرات هيعليها جامد وممكن تعدي ال ٨٠

[@eyad7893]

هي اصلا معديه ال80

[@amanymohamed8302]

لو محافظتك المنصوره او بورسعيد مش هتلحقي للاسف

[@Noor-om8ft]

تلحقى بإذن الله

[@SamiaDiab-yr5ji]

​@@amanymohamed8302 طيب انا جايبه 86,34 هل هلحق تمريض المنصوره ؟؟ انا كاتبها رغبه أولي

[@mariemhamdi4377]

٧٦ فى الميه الحق كليه التمريض جامعه بنى سويف

[@amalmokhtar33]

بالنسبة للبنات بشوف الزي الرسمي بيبقى بنطلون مينفعش جيبة او فستان ؟ والنقاب بردو

[@بسنتالنجار]

ياريت بجد حد يقولنا

[@manarlotfy5732]

ياريت بجد لأني مختمرة وخايفه😢.

[@mohamedmostafa9100]

لو سمحت يا احمد انا جايب ٧٣ علمي علوم ممكن الحق كليه تمريض او الحق كليه علوم طيب في اي محافظه ولا اي😢

[@AyaRagab-yn9pz]

نسيت حاجه مهمه جدا اللي هي التنسيق

[@om3bdall25]

لو سمحت بنتي جابت 51.5%وهي علمي وربنا اللي اعلم اتظلمت جدا لو سمحت بالله عليك رد عليا تنصحني تدخل ايه رد عليا بالله عليك عشان أنا محتاره وخايفه عليها

[@user-dl7um9rk6z]

متقلقيش كل اللي من عند ربنا خير يا طنط

[@NourSameh-dx3ww]

جبت ٨٩.٢٧ و جالي تمريض❤

[@user-yd1dm5lc8v]

68.5 الحق معهد فني تمريض؟ +ممكن تتكلم عن ازاي ادخل كليه تمريض بعد المعهد وهل يفرق كتير معانا؟!

[@user-jb5fd3vo1q]

شرحك جميل اللهم بارك

[@nadahaitham1274]

كلمنا عن تمريض عسكرى للبنات

[@user-cl4eh4ft7d]

حبيبي يا احمد يا ابني أنا بحبك في الله ما شاء الله عليك بحب شرحك للموضوع كنت متبعاك وقت الامتحانات عشان بنتي والحمدلله النتيجه بالنسبه لمجهود بنت ي كان غير مرضي للغايه بس الحمدلله قدر الله وماشاء فعل إحنا راضين بقضاء ربنا ممكن تكلمنا عن كليه التكنولوجيا الحيوية لاني عايزة اقدملها فيها لانها كانت نفسها في صيدله والحمدلله المجموع مش كويس أنا هقدملها في جامعه خاصه إن شاء الله . ربنا يبارك فيك ويرضي عنك

[@yous4785]

هي الجامعات الخاصه زي جامعه بدر بيكون عليها امر تكليف حكومي

[@ahmedmemory8617]

عايزين فيديو ازاى نقدم فى الجامعات الاهلية وهل لها امتحان قدرات ولا اتلغى كمان

[@amalahmed6624]

اتلغي بنقدم من الموقع بتاعهم من جوجل عادي

[@M.m-sx8px]

عاوزه اسال حضرتك سوال انا ثانويه عامه ونفسى ادخل كليه تمريض جامعه عين شمس هو فعلا لازم اكون جايبه 75% فى ماده الانجليزى عشان اتقبل فى كليه التمريض ولو جبت اقل من كده اللى هو اقل من37.5 من 50 مش هيقبلونى فى الكليه

[@menna46]

ممكن تتكلم عن معهد فنى تمريض وتنسيقه من كام او كلية تمريض خاص او اهليه وبكام وتنسيقها 😢❤

[@user-fi6qs1rq9c]

٨٠ و نص ممكن الحق تمريض بنها

[@marmaradly4943]

يا جماعة ٧و تنسيق المرحلة التانية والتالتة هينزل امتي كل ما اشوف في جوجل يكتب توقعات وبجيب بتاع السنة اللي فاتت عايزة الحق اشوف الكليات المتاحة عشان الرغبات وكدا

[@ahmedeltiaby]

هانت بعد المرحلة الأولى متخلص بيومين بالضبط إن شاء الله

[@samarhelal5694]

فعلا كليه التمريض الافى الجامعات الاهليه ملهاش تكليف حكومى

[@Rawan-xg2yz]

اتكلم عن كلية تكنولوجيا العلوم الصحية والتطبيقية وهي بفلوس ولالا من فضلك

[@ahmedeltiaby]

حاضر تحبى عن حاجه كمان

[@Rawan-xg2yz]

@@ahmedeltiaby شكرًا تسلم، ربنا يجازيك كل خير يارب

[@haninaa129]

@@ahmedeltiaby ايوه ياريت تتكلم عنها ضروري وبسرعه

[@ashraf77997]

​@@ahmedeltiaby عن كليتك بالتفصيللللل

[@user-dl7um9rk6z]

ايوا ياريت

[@user-pd3hh5lr4n]

لو سمحت هو انا جايبة 70 هل كلية تمريض تقبلنى وايه الكليات اللى تقبلنى تانى رد عليا لو سمحت

[@nadabadawy8nk5c]

وانا جايبه ٧٠،٦١

[@said.995]

لو سمحت هو لازم اكون جايب 75 في الميه في الانجليزي علشان ادخل تمريض

[@yasmina_8826]

ايوة ايدااا بجد

[@myqueen137]

لا دا للعسكرى

[@user-gn6pd6pk6v]

نا جايبه ٧٢,٤ممكن الحق كليه ف اي محافظه ماععدا اسوان

[@mostafamoas2176]

هل التمريض لو درسة سنتين كمان اطلع دكتور اطفال في ناس بتقول كدا عايز اتأكد من المعلومة وعايزة اعرف تجارة انجلش افضل ولا تمريض وكلمنا عن تجارة انجلش ومميزتها انا جايب ٢٨٩ ممكن اجيب تمرض او تجارة انجلش وازاي اكتب الرغبات لو انا من محافظة الاسماعيلة

[@user-ct7xh6oi3b]

انا مجموعي جاب الكليه ولكن انا عندي دلوقت 27سنه لاني كملت ثانوي مااخر يعني انا لسه متخرجه السنه دي هل هقد ادخل وهل السن بيحكم

[@user-mx4yf3on2z]

لو عايز اى مساعده لكلية التربية ممكن اساعدك انا داخل فرقة تانية❤ وفى قسم جديد فيها اسمه stem تبقى تخلى الناس تاخد فكره عنه لانه تانى سنه ليه

[@ahmedeltiaby]

أبعت لى يا غالى لو تحب أصور معاك تتكلم بنفسك لو من عن بعد حتى facebook.com/profile.php?id=100012208151331&mibextid=ZbWKwL

[@Ahmedalhashimy]

جمييل الله يباركلك ويوفقك

[@ahmedeltiaby]

وإياكم يا رب

[@salmasalah5541]

ابني جايب 68.29 في المئة يلحق معهد فني صحي أرجو الرد

[@user-wg8cs8wb7u]

لا مستحيل ان شاء الله يلحف معهد فني تمريض

[@habibanasser5968]

طيب مين افضل تمريض ولا بايوتكنولوجي

[@maimoamen3313]

67.5% ممكن الحق كليه تمريض حتى لو محافظة بعيدة

[@ahmedeltiaby]

ممكن معهد إن شاء الله ولو حابب تكمل بعده عادي

[@emanmo4245]

انا نفس المجموع اتمني نقبل تمريض💔

[@user-tq3rs5oz7q]

@@ahmedeltiaby ممكن الحق تمريض ٦٨ أسوان

[@NourMustafa-y5r]

لو سمحت 66.34 ممكن الحق الفيوم او اسوان او حلوان

[@user-dh1mm4qu2f]

هو ممكن اخش معهد تمريض انا جايبه 60 في اي محافظه

[@hanaasabry3921]

ايه الافضل لوسمحت لولد تمريض خاص ولا كليه علوم تطبيقية اشعة خاص

[@user-ff1wp5jh7s]

عايزين الفيديو الى. جاى عن كليه علوم معلش😊

[@asmaakhalil5601]

طب ٧٥ الحق تمريض كفر الشيخ؟

[@am2rw2led]

لو سمحت ممكن تقارن بين تمريض ومعهد فني صحي

[@ahmedeltiaby]

اتكلمت عن الجزئيه دى خريج معهد بيكون ممرض أو بيكمل كليه ويكون اخصائى تمريض وفى فرق فى المرتب طبعا واصل لحضرتك اقصد أى ولا أصور فديو كامل أفضل

[@am2rw2led]

@@ahmedeltiaby أو عند حضرتك وقت ياريت عشان بستفاد منك ❤️ اه انا جايب 328 هلحق معهد صح ؟

[@am2rw2led]

@@israaibrahem2692 شكرا 😍

[@ayaemad1608]

​@@ahmedeltiabyممكن اعرف اي الافضل الكليه ولا المعهد؟

[@Noor-om8ft]

طبعاً الكلية

[@SJCHCHRHDUXH]

عدد ساعات الشغل الحكومي بعد التكليف بيوصل لكام ساعه ف اليوم وهل هي مرمطه للبنات فعلا

[@Ahmedsaadi-y7n]

36 ساعه في الاسبوع بس يعني تاخديهم بمزاجك ممكن تاخديهم في تلاته ايام ويفضل باقي الاسبوع ممكن تقدمي في مستشفي خاصه وتاخدي مرتب عالي جدا ❤

[@nouragaith1196]

لو سمحت هو لو عملت الماستر وعاوزه اتعين دكتوره ف الجامعه دا بيبقى اكيد انى هتعين ولا احتماليه

[@zekratawakl3462]

لو سمحت ممكن اعرف ان فعلا لازم اجيب فوق 75 في الميه في الانجليزي عشان ادخل

[@Noor-om8ft]

لأ

[@zekratawakl3462]

@@Noor-om8ft تمام شكرا

[@hjkujfjyfdyjjyrryir4235]

هل درجتي في الانجليزي تؤثر علي دخولي كلية تمريض انا جايب ٢٩ في الانجليزي وجايب ٧٥ في المية بالله عليكي قولي

[@esraaabdalnaby6809]

وانا بردو جايبه ، 78% و27 فى الانجليزي

[@أسماءمحمد-خ6ذ]

دخولك الكليه مش معتمد علي درجتك في الإنجليش يعني مش بيبصوا ليها

[@أسماءمحمد-خ6ذ]

انما مجموع

[@user-du7ct2eo9n]

طب هل اهليه تبع التنسيق ولا اي وازي ققدم فيها طيب ممكن معلومات اكتر عن تمريض اهليه

[@ahmedeltiaby]

لا اهليه من 55% أو 60%

[@user-ct8tp7ki6j]

يغالي عندي الإنجليزي 69 لازم 70 ولا بنمتحن هناك

[@Noor-om8ft]

مش بتفرق درجة الانجليزي

[@mahmoudghlap428]

هل ينفع اكمل بعد كلية التمريض في كلية الطب البشري وشكراً

[@Noor-om8ft]

لأ

[@emanmo4245]

طيب لو سمحت انا ٦٧.٦٨ اعرف ازاي لما اكتب الرغبات انو هتقبلني سوا كليه او معهد حتي لو محافظه تانيه هل الي في التنسيق هيقولي وله انا هبقي عارفه اتمني ترد عليا وله امشي علي ااسنه الي فاتتت

[@Noor-om8ft]

بعد ما تسجلى الرغبات وفترة التسجيل تخلص ونتيجتها تطلع هتدخلى ع الموقع هتلاقى ورقة ترشيح ظاهرلك فيها سواء معهد أو كلية

[@nadiatawfik5426]

حد يرد بالله عليكم لو ضعيف ف الانجليزي اخد كورس انجليزي ولا اي

[@Noor-om8ft]

انجليزي المصطلحات الطبيه غير انجليزى السنوات اللى فاتت ممكن تحضر كورسات مصطلحات طبية اونلاين هتفيدك جدا ف الدراسة

[@esraamohamed6243]

بس فيه اكتر من دكتور قالى بلاش تمريض للبنات ومعهد فنى صحى احسن. اعمل ايه بجد انا دماغى تعبت!!

[@nadaosman5078]

طيب ليه وايه الفرق

[@esraamohamed6243]

@@nadaosman5078 بيبقو نبطشيات بليل ودى حاجه مش كويسه وساعات تعامل الدكاتره معاهم بيكون وحش وشغلهم متعب ليكى كبنت

[@nadaosman5078]

@@esraamohamed6243 طيب ما بتوع المعهد كده برضوا

[@Ahmedalhashimy]

رتبة أخصائي التمريض نفس رتبة الطبيب و أخصائي العلاج الطبيعي والصيدلي.. كله نفس المكانة وكله في شغله محدش له فضل على حد ولا يقدر يقل منه.. المعاملة اللي بيتكلموا عنها يمكن قصدهم على فني التمريض ودي حقيقة.. وحشة للبنات في السهر صحيح. أنا طالب بالكلية ونزلت مستشفيات وفاهم بقول ايه

[@nadaosman5078]

@@Ahmedalhashimy ماهو كده قصدك على فنى تمريض لاكن أنا بتكلم عن الكليه نفسها لان اي حد بسالوا وبقولوا تمريض واي كليه تانيه زى اعلام بيقولى تمريض !

[@myworld-vb9yd]

ازاي اعالج الانجليزي عشان دراسه عشان مشكله معايا

[@Noor-om8ft]

احضر كورس انجليزى مصطلحات طبية اونلاين مش انجليزي عادى

[@malkmagdy-cg9ew]

74.15الحق ولا لا برجاء الرد

[@MohamedHatem-t4k]

82.9 الحق كليه تمريض حتي لو في اسوان ياريت حضرتك ترد عليا

[@abdelrhmanharbi6724]

مجموعك اعلى من تنسيق التمريض اساسا بتاع السنة اللي فاتت

[@ebtsamragab2937]

لغوا التوزيع الجغرافي مجموعك جايب جامعات كتير

[@user-gw9mq7oz5d]

لو سمحت رد عليا أنا جايبة مجموع ٥٥وكسر تقبل حقوق أو معهد فن صحى علمى علوم أو معهد تمريض هل تقبل التلاتة دول

[@user-jl3bu1vp7d]

ممكن اعمل معادله لابني هو ثانوية ازهرية مجموعه بعد المعادله يدخله كلية تمريض هل صحيح بتكون كليه خاصة مش حكومي

[@YousefMohamd-ys5gs]

حاصل على معهد تمريض وخلصت السنه دي الكليه هتاخد من كام وامتي التنسيق

[@user-pg9fh3th6n]

دخلت الكلية؟

[@YousefMohamd-ys5gs]

@@user-pg9fh3th6n لا مادخلتش الكليه حاصل على معهد فني تمريض وهستلم التكاليف وفي جيش

[@abdulrahmanbkr8054]

هو لو انا wear leg prosthetic ينفع اخشها ولا لا يعنى طرف صناعى من لاخر

[@abdulrahmanbkr8054]

يريت الرد بعد ازنك

[@user-hh5kz7rv1l]

ياريت تنزل الطب البيطري قريب❤❤❤❤

[@ahmedeltiaby]

حاضر إن شاء الله

[@user-bj3fu7yy5h]

ايه الأفضل تمريض ولا زراعه قسم بايو تكنولوجي

[@nourtv3559]

تمريض

[@crz11uu]

@@nourtv3559 زين شكد معدل مسائي اذ 73 او اقل انقبل لولا ?

[@amanymohamed8302]

بنت خالتي سابت علاج طبيعي ودخلت تمريض

[@crz11uu]

@@amanymohamed8302 شكد معدله

[@Noor-om8ft]

تمريض

[@user-hn9pb9il4l]

لو سمحت 69.7 ادخل تمريض ولا لا

[@user-es8nk1oe7s]

وانا كمان ٦٩.٦% ياريت يرد بجد

[@saraomar2468]

لو سمحت ابنى 88.78 ممكن يلحق صيدله بإذن الله

[@amanymohamed8302]

للاسف لا هتلحقي بيطري

[@saraomar2468]

@@amanymohamed8302 خير إن شاء الله

[@user-cv3qo7ys5j]

😮التواصل مع حضرتك اواي

[@سهامحمد-ظ1ص]

75,7 ممكن الحقها المنيا أو بني سويف خاصه بعد زياده الإقبال عليها السنادي ممكن تنسيقها يعلى ولا لأ 😢

[@ahmedeltiaby]

أه إن شاء الله تلحقى

[@YoussefYaser-jj9uq]

@@ahmedeltiaby عايز اتواصل معاك

[@wafaaqorany1153]

لو سمحت نا لو دخلت كليه تمريض خاص هل ليها اختبار قدرات بالله عليك ترد

[@raheemmohamed7162]

طب تمريض احسن ولا علوم قسم نانو تكنولوجي؟

[@Noor-om8ft]

تمريض ناس بتخلص علوم وتكمل بعدها تمريض برنامج مكثف وبتندم على سنين كلية العلوم

[@user-vo6lk6pj8l]

بالله عليك تقلي اي الاحسن طب بيطري ولا تمريض

[@user-sh6fh7uc1m]

76هلحق تمريض الفيوم ؟😢

[@user-tq3rs5oz7q]

٦٨ الحق تمريض أسوان

[@AmiraSleman-hk5pn]

دا التخرج من اى معهدولا يشترط تأمين ولا تمريض عادى

[@user-du7ct2eo9n]

ازاي ادخلها اهليه طيب وهل الاهلي ليه علاقه بالتنيق يعني لازم انسق ولا لاه ممكن توضحلي عشان ققدر ادخلها

[@ahmedeltiaby]

الأهلية تنسيق لوحده بتقبل من 60% أو أقل كمان

[@user-du7ct2eo9n]

@@ahmedeltiaby اه انا ققصد ققدم ازاي وكده وهل لازم انسق في مرحلتي واكتبها رغبات ولا ققدم فيها عالطول من غير تنسيق

[@user-yr7lb2tt3b]

لو سمحت انا كنت ناويه ادخل كليه تمريض اهليه والي حوليا قالولي انها مش كويسه للبنات ان الواحده ممكن تغير لاي مريض وكمان الشيفتات بالليل وبيقولولي خشي حاسبات ومعلومات اهليه فاعمل ايه محتاره اوي؟

[@asmaahassan9294]

عملتي اي

[@nadaosman5078]

لو سمحت ممكن ترد ضرورى انا قدامى اعلام وتمريض وانا حاسه انى مياله لاعلام اكتر بس كلوا بيقولى تمريض رايك ايه

[@احمدمحمد-ف5ر2ح]

تمريض عشان التكليف

[@Noor-om8ft]

تمريض

[@hod825]

وانا زيك بردو بس اهلي بيقولوا ادخلي اعلام علشان تمريض مش كويس للبنات

[@Mohammed3li-n5d]

هو ممكن اعمل دبلومه وافتح معمل تحاليل اكيد ولا ايه بالله رد 😢😢

[@Noor-om8ft]

دا كلام لسه ظاهر جديد ومفيش حاجة مؤكدة عنه بس هنعرف الفترة الجاية إن شاء الله

[@user-gr6ru7oq5y]

انا ادبى هينفع ادخل تمريض ومن مجموع كام

[@shahodaa159]

تمريض من علمى علوم بس

[@user-vb3pw4rn5k]

دبلومة التحاليل في تكون موجودة في انهي جامعه بالنسبه لتمريض و بتكون ايه شروطها؟

[@sanaaqasem9036]

ينفع طالب ادبي أزهر يدخل تمريض خاص بالله عليك لو عارف الاجابة ترد

[@AyaRagab-yn9pz]

ممكن تتكلم عن تنسيق كليه تربيه طفوله مبكره؟

[@esraa7588]

هشوف الفيديو بس اما ادخلها ان شاء الله 😢وياريت تقولنا هى هتاخد من كام لو انا ٧٣ ٪

[@ahmedeltiaby]

فى فى الفديو صوره لتنسيق كل الكليات والمعاهد العام الماضي

[@esraa7588]

@@ahmedeltiaby شوفته بس اسكندرية كانت ٧٤ وانا من البحيرة ف ممكن يقل التنسيق ولا هعمل اى مش عارفه 💔

[@MalakMohamed-xl3hi]

عايزين فيديو تربيه طفوله

[@ahmedeltiaby]

بس كده حاضر إن شاء الله تحبى عن حاجه كمان

[@user-kv5iu8wu3m]

ايه رأيك فى علوم ؟

[@eyad7893]

اصعب كليه فمصر و من احسن الكليات في مصر

[@amanymohamed8302]

​​@@eyad7893 كدا انا عرفت انت في كليه اي وعمال تذم ف تمريض لي 😂

[@user-bf9mo5ct8j]

السلام عليكم ورحمة الله وبركاته ممكن تجاوبني؟؟ لو عملت تظلم في مادة جايبة فيها النص ممكن يشيلوا درجات الرأفة ويسقطوني ؟؟ حتى لو قاتلهم خلاص راضية بالنص؟؟ خايفة جدا من كدا بالله تجاوبني

[@user-py1kx4pg7t]

لا مفيش الكلام ده

[@ahmedeltiaby]

لا التظلم مش بينقص إطلاقا

[@user-kw5zk3bd3e]

60%يدخل تمريض وشكرا 🙏🏻

[@AHMeDdMeTOO]

لا و للأسف مش هتلحق معد حاول تدور على جامعة خاص أو أهلية من 30 ل 50 الف فى السنة على حسب كل جامعة

[@user-wf1pr1if9r]

💔❤💓❤❤❤💓💓💓💙💙💙💎💎💎🕋🕋🕋🕋🇪🇬🇪🇬🇪🇬💓💓💓💔💔💔💔❤❤❤❤🇪🇬💙🇪🇬💙💙💙💎💎💎💎💙💙💙🇪🇬🕋

[@why2u]

٨٩.٧ علمي علوم الحق كليه اي وموقفي من علاج طبيعي واسنان وصيدله 😢

[@ahmedeltiaby]

تلحقى إن شاء الله صيدله وعلاج وبيطرى

[@amanymohamed8302]

بنت خالتي سابت علاج ودخلت تمريض 🙂

[@ranakhalid8358]

اختار ألسن ولا علوم إعاقة ولا تمريض

[@Noor-om8ft]

تمريض

[@fatmazakaria8644]

77ونص اقبل كلية تمريض حلوان او قاهرة؟

[@user-qu4ys4lo7u]

كان حلمي ابقا معيد لحد اما عرفت ان المرتب ٤٠٠٠ جنيه

[@ahmedeltiaby]

يا صديقي المعيد ليه امتيازات زى ماجستير مجانا ومنح وخلافه متخليش نظرتك سطحية عارف مصاريف الماجستير بكام ؟

[@user-qu4ys4lo7u]

@@ahmedeltiaby طيب ممكن تذكر الإمتيازات التانيه

[@holemagady3547]

​@@user-qu4ys4lo7uيعني ايه وبقيت كده ولا ايه

[@إبراهيماحمد-ج3ت]

كلية تربية من فضلك وجزاك الله خيراً

[@ahmedeltiaby]

بس كده إن شاء الله عاوزه حاجه كمان

[@user-jt2qy9uy8v]

لو سمحت ممكن طلب هل التمريض الخاص لة فرص عمل زى التمريض الحكومى رد علية لو سمحت

[@ahmedeltiaby]

ليه تكليف برضه لأن بجد فى عجز

[@user-jt2qy9uy8v]

@@ahmedeltiaby شكرا على اهتمامك

[@amanymohamed8302]

تقصد كليات التمريض الخاص ولا الاكاديميات

[@lexi.4862]

60 الحق المعهد؟