Рет қаралды 971,506
اللي يحب ينحي خمجة من قلبو... يمشي يفطر عند بو أحمد!!
بو أحمد عندو مطعم شعبي في اول نهج حنون (اول دورة على اليسار بعد ميلفاي اليهودي ). المطعم يعمل كسكروتات عربي و لبلابي في الصباح, و صحين تونسي, و طبيخ من شكشوكة (صيفية و شتوية) بالفين فرنك و بالفين و نص كان بالعضمة’ و لوبيا باربعة الاف فرنك و الا بالفين و نص كان لوبيا sans معناها من غير لحم, ومقرونة و هرقمة و صحن الالعاب و غيرو من الاطباق. ايه نعم شكون ما ياكلش و يعبي كرشو بماكلة عربي تقول تاكل في داركم!!
بو أحمد يخدم في المطعم مع مرتو منية , ديما يقول عليها هاكي راس المال, و مع ولدو حمادي المتخصص في الكسكروتات. فبحيث تحس روحك مشيت تفطر عند دار قرايبك و قعدة عائلية.
المميز في المطعم هو الفريد المتفرد بو أحمد, او منشط القعدة. راجل انتيكة يخليك تضحك من قلبك و انت تفطر من غير ما تشعر, يحكي بلهجة صفاقسية متاع البو والجد وعندو القوالب حاضرة و الصرف موجود و كل واحد يعطيه شربو و يخلي الناس اللي تفطر عاملة كيف. النكتة تجري في دمو و يعرفك و الا ما يعرفكش يدخل معاك في الجو و هو يسربي لعباد و يجيبلهم ماكلتهم. حتى انو الناس اللي تجي و تبدى تستفز فيه و تنابش فيه باش يحكي معاهم و يفدلك معاهم. و ساعات اتطيرلو و يدور بيه الدجاج الاكحل في تبدى الخدمة موش ماشية و ولدو و مرتو يبطاو عليه في تحضير الاصحنة. يبدى يعيط و يتعارك معاهم و يدعي على روحو بالشر دعوات قديمة برشة متاع الصفاقسية القدم اللي برشة من الصغار ما يعرفوهمش, اللي يخلي الناس اللي جات تفطر تزيد تستفزو باش يزيد يتنرفز و يعملو معاه ضحكة. و هذا بالضبط سر شعبيتو الكبيرة, الناس تجي باش تاكل ماكلة بنينة و تضحك ضحكة من القلب, جو يفكرهم في جو الاعراس العربي القدم.
بو احمد عندو اكثر من اربعين سنة في الطبخ خدم ثلاثة سنين وقت كان عمرو عشرين في مطعم في تونس العاصمة و من بعدها شد في البلاد العربي. كان عندو مطعم في سبط الرومي و بعد حول لنهج حنون.
أحمد السلامي - صاحب مطعم شعبي - المدينة العتيقة بصفاقس
Nes Lemdina ناس المدينة
#Nes_Lemdina
باب الجبلي للتوثيق
bebjebli.tn/
/ bebjebli.tn
Production: SoWhen? Mohamed Marouene