Рет қаралды 3,197,760
മണ്ണാർക്കാട് പരിഭ്രാന്തി പരത്തി ദേശീയപാതയിലൂടെ ആന. കാരാപാടത്ത് തടി വലിക്കാനെത്തിയ ആനയാണ് ഉച്ചക്ക് രണ്ടരയോടെ അക്ഷമ കാട്ടിയത്. ചൂട് സഹിക്കാനാകാത്തതോടെ ക്ഷമ നശിച്ച ആനയെ കുളിപ്പിക്കാനായി കുരുത്തിച്ചാലിലേക്ക് കൊണ്ടുപോയി. ഇതിനിടെ സമീപത്തുണ്ടായിരുന്ന സന്ദർശകരായെത്തിയ യുവാക്കൾ ബൈക്കിൽ നിന്നും ഹോൺ മുഴക്കിയതോടെ ആന കൂടുതൽ പരിഭ്രാന്തി പരത്തുകയായിരുന്നു. തുടർന്ന് കല്യാണകാപ്പ് ചുങ്കം വഴി ദേശീയപാതയിലേക്ക് പ്രവേശിച്ച ആന മണ്ണാർക്കാട് എം ഇ എസ് കോളേജിന് സമീപമെത്തിയാണ് നിന്നത്. 12 കിലോമീറ്റർ ദൂരമാണ് ആന റോഡിലൂടെ സഞ്ചരിച്ചത്. ഇതിനിടയിൽ ഒരു നാശനഷ്ട്ടവും വരുത്തിയില്ല. സ്കൂൾ വിടുന്ന സമയമായതിനാൽ എല്ലാവരും ആശങ്കയിലായിരുന്നു. മൂന്നരയോടെ എംഇഎസ് കോളേജിന് സമീപം കയറ്റത്തിൽ ആനയെ തളക്കുകയായിരുന്നു. വെള്ളം നനച്ചും ഭക്ഷണം നൽകിയും ആനയെ തണുപ്പിച്ചു. കോളേജ് വിട്ട് ബസ് കാത്തിരിക്കുകയായിരുന്ന വിദ്യാർത്ഥികളെ പെട്ടെന്ന് തന്നെ അകത്ത് കയറ്റി. ആന ഇവിടെ നിലയുറപ്പിച്ചതോടെ ഒരു മണിക്കൂറോളം ഗതാഗത തടസ്സമുണ്ടായി. നിരവധി ജനങ്ങളാണ് വിവരമറിഞ്ഞ് തടിച്ചുകൂടിയത്. 500 മീറ്റർ കൂടി ആന സഞ്ചരിച്ചിരുന്നെങ്കിൽ മണ്ണാർക്കാട് നഗരത്തിലേക്ക് പ്രവേശിക്കുമായിരുന്നു. ആനയെ തണുപ്പിക്കാനായി ഫയർഫോഴ്സിനെ വിളിച്ചെങ്കിലും അവർ വരാൻ തയ്യാറായില്ലെന്ന് നാട്ടുകാർ പറഞ്ഞു. കോളേജിന് സമീപം ആനയെത്തിയപ്പോഴേക്കും ഫയർഫോഴ്സ് വന്നെങ്കിലും നാട്ടുകാർ തിരിച്ചുവിടുകയായിരുന്നു.
കൊണ്ടോട്ടി സ്വദേശിയുടെ മിനി എന്ന പിടിയാനയാണ് പരിഭ്രാന്തി പരത്തിയത്.