Рет қаралды 25,308
Հրդեհային անվտանգության կազմակերպման մասին Գլխավոր շտաբի պետի հրամանը չի ծանուցվել սպաներին և հետևաբար զինվորներին։ Այս փաստի վրա էին ուշադրությունը հրավիրում փաստաբանները Վարդենիսի զինվորական կացարանում հրդեհի գործով հուլիսի 10-ի նիստին, երբ հանրային մեղադրողները կարդում էին դտարան բերված քննության հատորները։ Համապատասխան հրամանը, ինչպես նաև այլ նմանատիպ փաստաթղթեր, բանակային կյանքում ձևական բնույթ են կրում և հաճախ ձևակերպվում են պոստ ֆակտում։ Բացի այն, որ տվյալ դեպքում հրամանից նաև էջեր են պակասում, այն արձակվել է 2022 թվականի Ադրբեջանի սեպտեմբերյան հարձակումից առաջ և վերաբերում էր դիրքերին և զորամիավորմանը, որոնք 2023-ի հունվարի 19-ին՝ 15 զինվորի կյանք խլած հրդեհի օրը, գոյություն չունեին։
Զոհվածների ծնողները վրդովված էին հանրային մեղադրողների «լոլոներից» և պահանջում էին, օրինակ, դատարան բերել գյուղապետարանի և գոմի վրա տեղադրված տեսախցիկները հրդեհի օրվա վիդեոները․
- Սա րդեն անգիր գիտենք։
- Գնալով ավելի է խճճվում գործը։
- Վախտին ո՞ւր էիք։
- Պիտի 15 հոգու գլուխն ուտեիք, որ նոր անվտանգությունից խոսայիք։
Զորամասի կոմունալ ծառայության պետ Մառլեն Սարգսյանի փաստաբանը նշել է նաև, որ հունվարի հրդեհը միակը չէր, և հարց բարձրացրել՝ ինչո՞ւ նախորդ հրդեհից հետո, երբ զոհեր չեն եղել, ոչ ոք պատասխանատվության չի ենթարկվել և չեն ձեռնարկվել համապատասխան անվտանգային միջոցառումներ։
Ինչպե՞ս է գյուղական դատարկ տունը՝ լուսամուտներին ճաղավանդակներով դարձել կացարան երկու տասնյակ զինծառայողների համար։ Ո՞ր կարգավորումներով են գյուղական տունը փոխանցվել ՊՆ-ին, այնտեղ վերանորոգման և այլ շինարարական աշխատանքներ իրականացվել (գիտենք, որ զինվորների և իրենց ընտանիքների ջանքերով և գումարներով է այն արվել)։ Ի՞նչ կլիներ, եթե տան սեփականատերը «ՊՆ-ի ներդրումներից» հետո պահանջեր վերադարձնել իր գույքը։ Այս հարցերը մնացին անպատասխան։
Մյուս նիստը նշանակված է հուլիսի 12-ին, ժամը 12։00-ին Սևան քաղաքի դատարանում։
Նախորդ նիստերի մասին՝
Մի ժամվա մեջ անճանաչելի մարմինները նույնականացրեցին․ 15 զինվորների մահվան գործը - epress.am/2024...
Վարչապետը ուղղորդել է հրդեհի քննությունը․ ծնողների ցուցմունքները դատարանում - epress.am/2024....
Զինվորական կացարանի հրդեհում ողջ մնացած զինվորը նոր ցուցմունք է տվել - epress.am/2024....
«Անընդունելի ա իմ վրա ամեն ինչ բարդելը»․ 15 զինվորների մահվան գործը - epress.am/2024....
Տուժածի ցուցմունքը վերածվեց մեղադրյալի հարցաքննության. 15 զինվորների մահվան գործը - epress.am/2024....
Թարմացումները՝ t.me/epressam