MILL-ĠDID CHAIRMAN KONTRA L-KORRUZZJONI

ONE.COM.MT •
L-Imħallef Emeritu Lawrence Quintano reġa’ nħatar bħala Chairman tal-Kummissjoni Permanenti Kontra l-Korruzzjoni, il-PCAC. Dan wara vot unanimu fil-Parlament favur mozzjoni mressqa mill-Ministru responsabbli mill-ġustizzja, Jonathan Attard.
Fi stqarrija, il-Ministeru għall-Ġustizzja qal li din kienet l-ewwel darba li ċ-Chairman tal-Kummissjoni Permanenti Kontra l-Korruzzjoni se jkun qed jinħatar mill-President tar-Repubblika, li taġixxi skont riżoluzzjoni tal-Kamra tad-Deputati, li tgħaddi bil-voti ta’ mhux inqas minn żewġ terzi tad-deputati kollha.
Il-Ministru Attard iddeskriva lill-Imħallef Emeritu Quintano bħala persuna ta’ integrità kbira, li serviet fi rwoli differenti, inkluż bħala imħallef, maġistrat u anke fl-uffiċċju tal-Avukat Ġenerali.
Dr Attard sostna li mhemmx dubju li l-Imħallef Emeritu hu bniedem mill-iżjed ippreparat biex imexxi din il-Kummissjoni bil-maturità, ir-responsabbiltà u l-bilanċ meħtieġ f’dan iż-żmien meta l-Gvern hu kommess li jkompli jsaħħaħ ir-riżorsi tagħha.
Intqal li l-Gvern qiegħed jipprovdi r-riżorsi kollha meħtieġa biex din il-Kummissjoni tkompli twettaq ix-xogħol tagħha, inkluż b’żieda fir-riżorsi umani, fejn għaddej proċess ta’ reklutaġġ.