Mungesa e konsensusit për Ligjin e Magjistraturës, drejtori Sadushi: Efektet negative pas 3 viteve

“Studio e hapur” nga Eni Vasili ne News24
24 korrik, 2018
I ftuar në emisionin “Studio e Hapur” në News 24, Drejtori i Shkollës së Magjistraturës Sokol Sadushi u shpreh se ne mund të mos kemi Gjykatë Kushtetuese për momentin, por se ajo e Lartë dhe Shkolla e Magjistraturës janë në funksion. Ndërkohë sa i përket këtij ngërçi sipas tij ka faj politika dhe ndoshta edhe qeveria e cila duhet të merrte masa ose informacion që lidhet me godinat dhe personelin.
Eni Vasili: Jemi pa Gjykatë Kushtetuese, të Lartë dhe me Shkollën e Magjistraturës në ngërç.
Sokol Sadushi: Ne jemi pa Gjykatë Kushtetuese, por nuk jemi pa Gjykatë të Lartë dhe pa Shkollë të Magjistraturës. Po i kujt është faji? Është i organeve të Vettingut? Është i gjyqtarëve që u konstatuan me shkelje? Është faji i projketuesve që nuk menduan që do ta linin vendin pa Gjykatë Kushtetuese? Unë them se të gjitha këto janë menduar. Kjo nuk do të zgjatë shumë ose duhet ta kishim pranuar që ka një ngërç.
Eni Vasili: Kush e ka fajin?
Sokol Sadushi: Mendova që 140 deputetët e kishin lexuar Kushtetutën dhe se çfarë do të sillte kjo Kushtetutë. Është faji i politikës që u vonua kaq shumë. Mund të ketë faj edhe mazhoranca dhe qeveria duhej të tregohej më e përgjegjshme, pasi duhej të merrte masa ose informacion që lidhet me godinat dhe personelin.