Рет қаралды 2,971
Мурчакэнан саф па саф,
Тама па дуф макинаф.
Дадьак хурэ кор кинан,
Ху корат ризгор кинан.
Мурчакэнан туқат ҷуфт,
Наживҷан дадь харҷэ муфт.
Арчай аз дуф накихьт кор,
Аз умта саван бизор.
Мурчакэнан лап тифоқ,
Наживҷан корэ чатоқ.
Дуфа на шум на танбал,
На лачарат на касал.
Мурчакэнан лапат дус,
Дадьакан лап ба номус.
Бихарҷат донайат вэз,
Насаван дадь тар ху рэз.
Мурчакэнан лап ухьйор,
Аз фук хатар хабардор.
Пиройась аз заминҷум,
Нихьтэйанта дьум па дьум.
Пиро аз абрат борон,
Дуфрэ дьайандьэд айон.
Ху тахмурғэнта цэхьан,
Тар хухькаэн кирэхьан.
Мурчакэн нақлэ дироз,
Кандэ ид вазд ар му соз.
Фақат ту икдай визон,
Аз мурчакэн нист зийон.
Мурчакэнан саф па саф,
Ичась па дуф мабираф.
Лак айалэ ҷон кинан,
Фикрэ зимистон кинан.