Рет қаралды 517
ONE.COM.MT • Waqt attività soċjali, bħala parti mill-kampanja għall-kariga ta’ President tal-Partit Laburista, il-kandidata Norma Saliba saħqet li r-riċetta ta’ suċċess għall-Partit Laburista hi li dik li jisma’, janalizza u jaġixxi.
Saliba semgħet dak li kellhom xi jgħidu bosta delegati tal-Partit Laburista, li min-naħa tagħhom għaddew suġġerimenti li jixtiequ li jaraw isiru fiż-żmien li ġej.
KITBA: ONE NEWS
FILMATI: ARKIVJI
Norma Saliba, li qed tikkontesta għall-kariga ta’ President tal-Partit Laburista, tkellmet dwar il-viżjoni tagħha għall-Partit Laburista biex ikun aktar organizzat fil-ħidma tiegħu.
Fost l-oħrajn, hi tkellmet dwar il-kumitati lokali fejn ipproponiet li l-ammont ta’ membri li jkollhom ikun jirrifletti l-ħtiġijiet tal-lokal tagħhom. Sostniet li d-delegati għandhom ikunu fiċ-ċentru tal-ħidma tal-Partit għax jistgħu jixprunaw ideat ġodda.
Saliba qalet li rwol importanti li għandu jkollhom id-delegati hu li jġibu lura lil dawk in-nies li, għal xi raġuni, tbiegħdu mill-Partit, waqt li wegħdet li lesta taħdem, id f’id magħhom, biex tavviċina lil dawn in-nies u terġa’ ġġibhom lura.
Hi tkellmet ukoll dwar il-bżonn ta’ tisħiħ fis-sistema tal-customer care tal-Partit, filwaqt li saħqet il-ħtieġa li jkun hemm aktar kordinazzjoni biex l-ilmenti li jitressqu, jiġu indirizzati fl-iqsar żmien possibbli.
Żiedet tgħid li prijorità oħra, li se taħdem fuqha, hi l-midja biex il-partit isir aktar proattiv f’dak li hu xandir ta’ informazzjoni u jżomm lill-poplu informat il-ħin kollu u b’hekk tonqos il-ħsara, li qed issir mill-mezzi soċjali, meta jixxandru aħbarijiet foloz.
Saliba saħqet ukoll dwar il-ħtieġa tal-għaqda fil-Partit.
NORMA SALIBA
KANDIDATA GĦAL PRESIDENT PL
“Ir-riċetta biex naslu toqgħod fuq tlieta - nisimgħu, nanalizzaw x’għandkom xi tgħidu u niddeċiedu u b’hekk inkunu forza ta’ bidla u forza rebbieħa.”
Matul l-istess attività, bosta delegati għamlu interventi fejn wasslu suġġerimenti u proposti dwar dak li jixtiequ jaraw fil-Partit Laburista.