نوتيلا كريمية مضمونة جدااا من غير سكر ولا زيت ولا لبن بودرة ولا شوكولاتة..

النوتيلا البيتي الصحية
المقادير ممكن تضاعف..
اللبن بيتضاف كميات صغيرة بالتدريج لغاية الوصول للقوام المطلوب..
العسل حسب الرغبة في التحلية (ممكن سكر أو بديل سكر ولكن أنا فضلت العسل للبعد عن السكر قدر الإمكان)
المقادير:
100 جرام بندق مقشر ومحمص
معلقة كبيرة (ممكن أقل) من الكاكاو الخام (بلاش الكاكاو الغامق اللي لونه مايل للأسود وده في الأغلب بيكون السايب)
حوالي معلقتين كبار عسل (أكتر أو أقل حسب الرغبة)
حوالي ربع كوباية لبن
الطريقة:
هنتطحن البندق كويس جدًا جدًا ويُفضل يكون دافي علشان يطلع الزيوت بتاعته أسرع..
البندق هياخد حوالي 7 ل 10 دقايق في الكبة لغاية ما يتحول لزبدة طرية كريمية تماما.. الموضوع عايز بس شوية صبر صغيرين أوي..
بعد كده هنضيف معلقة الكاكاو ونخلط كويس جدًا... لغاية هنا القوام هيكون ممتاز ولكن هيكون محتاج تحلية واللون كمان هيكون أغمق شوية من النوتيلا الأصلية..
هنضيف العسل ونخلط وفي المرحلة دي هاتلاقوا الخليط بعد ما كان ناعم بقى ناشف شوية مفيش أي مشكلة هنكمل عادي ونخلط كويس تاني وبعد كده نبدأ نزود كمية اللبن تدريجيًا ونخلط وهتلاحظوا إن الخليط هيرجع تاني كريمي وناعم تماما... هتزودوا اللبن حسب القوام اللي تحبوه... مش هيحتاج أكتر من ربع كوباية وممكن ماتحتاجوش الكمية كلها..
وبس كده.. النوتيلا البيتي بقت جاهزة بدون سكر ولا مواد حافظة..
ملحوظة.
ممكن تزودوا مكعبات شوكولاتة لو تحبوا بس تكون شوكولاتة بالحليب مش غامقة.. بس دي إضافة مش أكتر لكن الوصفة دي من غير شوكولاتة..
#البيتي_يوكل

[@shaimaabadry4557]

فعلا لما بيتحط العسل بتقفش في بعضها بشكل غريب

[@Wessam_Haggag]

كملي خلط عادي جدا وزودي لبن زي الفيديو هاتلاقيه رجع قوام كريمي... جربي وقوليلي :)

[@kenzieeslam1579]

تسلم يديك يا مامي ❤❤❤❤

[@Wessam_Haggag]

حبيبة قلب مامي ❤

[@karlayoussef9577]

تسلم إيديكى يا ويسا. هجربها

[@Wessam_Haggag]

بجد يا كوكي ❤ ياريييت.. مستنية رأيك 😘

[@karimanharoon7576]

ده انا لازم أجرب ما شاء الله تسلم ايديكي شكلها يجنن 😍😍😍

[@Wessam_Haggag]

تسلميلي يارب ❤ ياريت بجد تجربيها وتقوليلي ❤❤

[@omhagermasria4146]

تحفه تحفه اللهم بارك شيف وسام القمرررر❤❤❤❤

[@Wessam_Haggag]

تسلميلي يارب يا أم هاجر ❤❤❤