Рет қаралды 6,284
O‘tkir leykoz - leykozning tez rivojlanuvchi formasi bo‘lib, suyak ko‘migida normal etilgan qon shaklli elementlariga differensiatsiya bo‘lmaydigan etilmagan gemopoetik blast hujayralarning ko‘payishi bilan xarakterlanadigan kasallik. O‘tkir leykozda (O‘L) suyak ko‘migida morfologik etilmagan qon xujayralari (blastlar) ko‘payishi oqibatida normal gemopoez elementlari kamayib, uning o‘rnini blast hujayralari egallay boshlaydi. Keyinchalik esa ularning organ va to‘qimalarga tarqalishi bo‘ladi. Hamma O‘L klonal, ya’ni bir o‘zgarilgan (anomal) qon hujayralaridan tashkil topadi, bu hujayra ilk yoki etilayotgan bosqichdagi o‘zak hujayralaridan hosil bo‘lishi mumkin. Blast hujayralarning qaysi qatorga tegishliligi va etilish darajasi uning turini, klinik kechishini, davosini, davo effektini va prognozini aniqlaydi. O‘L jami xavfli o‘smalarning 3%ini tashkil etadi. Hamma O‘Lning 75%i kattalarda, 25%i bolalarda bo‘ladi. O‘tkir mieloblast leykozlar (O‘ML) va o‘tkir limfoblast leykozlar (O‘LL) nisbati 6:1 ga teng. Bolalarda 80-90% O‘LL, 40 yoshdan keyin 80% O‘MLni tashkil etadi. O‘LLda o‘rta yosh 10 yosh bo‘lsa, O‘MLda esa 60-65 yoshga to‘g‘ri keladi.