Рет қаралды 1,253
روزِ کُوہ مے ہمچو دمساز سوزِ سُلطانس اندر
بوزِ یِم مجنونہ آلو ، چِھ دِلِ دیوانس اندر
پیٖربل کی تیٖرٕ پھل چِھم لأرۍ لأری یتھ دِلس
زیٖر و بم مضراب کھؠتھ آس، ژاس مَے خانس اندر
شولہٕ وُن مَے روز و شب چُھس لولہٕ بٔرۍ تؠن بأگران
تولہٕ کوتاہ لولہٕ خم خان ، بوٚر مےٚ پیمانس اندر
پُر حُباب میانے سوٚدرٕ دراو ہأنگنٛین منز رچھنہٕ آو
دُر بٔنِتھ جلوٕ دِوان ژاو سازو سامانس اندر
گوہرِ مقصوٗد میونُے صاد کِس صدفس اندر
جوہری مۄل کٔرۍ کٔرۍ لوٗسۍ بزمِ عرفانس اندر
ژالہٕ کوتاہ زالہٕ نووتھس ، کالہٕ سوٚدرس دم دِوان
لعلِ مرجان گَتھ چِھ ماران خالہٕ کِس دانس اندر
رنگ تہٕ بیرنگ جلوہ معشوق ہر وِہہِ وُچھ متیو
ننگ تہٕ ناموس کتہِ چُھ روزان عشقہٕ طوفانس اندر
شاہِ عشقن حُسنٕچے زنجیٖرِ کرِنم ہیرِ بۄن
پایِہ تھدِ شاہ باز بند گٔے زُلفِ پیچانس اندر
کامہٕ دیٖوٕ سٕنزِ ویرِ زُنار پوٗرِ پوٗر کأفر وُچُھم
رام رامن رام کٔرۍ مٕتی چُھکھ صنم دھیانس اندر
جابجا غوغایِ من پیوٚو ہمچو بُلبل پُر جنون
راہِ نبیِچ شنوایی چھٚے کأنسہِ انسانس اندر
زانہِ یُس پننُے بدن دُرِ عدن ہیُو ہیرِ بۄن
شانِ قرآن تس روشن پننسِے پانس اندر
الفکِس دینس اندر چُھس لامہٕ کُے مذہب رچھان
میٖم سٕے زرگؔر وُچھان احد کِس شانس اندر
کلام احد زرگر
گلوکار گلزار احمد گنائی