Рет қаралды 658
شوقن میہ کٔرنم یارٕ سٕنز زنجیر ونَے کیاہ
ذوقن بہ دیووُس نالَۂ شب گیر ونَے کیاہ
دۄئی رۆس وُچُھم ساقی رِندن میخانہ چاواں مۄے
سُے مَس میہ بخشِتھ گوو نۄوُے تأثیر ونَے کیاہ
نوزُک چھِ توسٕکۍ پن بہ کھالاں است استَے گوس
سوزُک چُھ أندری گریز تُلِتھ بم زیر ونَے کیاہ
موتس نِشن ہأرتھ وچِھم سأری میہ زیونُم داو
طوطس حیاتُک چۆن دِتُم مۄے شیٖر ونَے کیاہ
دنیا تہٕ عقبا چُھے پزر بۆر ما میہ کانہہ پرواہ
شنیاہ گژھتھ کیہنُک بہ چُھس رہگیر ونَے کیاہ
حافظ چُھ ہر دم خۄد یہِ عشقُن رہنما ہرجا
نأفذ کراں ہجرُک گہے تعزیر ونَے کیاہ
حَی کِس سَرس وأنژر بنتھ وچھنے بہ وونتس گوس
طَے ما سپُن صِفرُک سفر تقصیر ونَے کیاہ
پردَے تُلِتھ زیۆ دِنۍ پیواں گاہے چھیہ اسرارن
مۄردَے دلن کیُتھ تی بناں اکسیر ونَے کیاہ
قلمس چَھما حرکت پنٕنۍ چھے تورٕچی اتھ زیر
ہلمس اندر لفظن براں تفسیر ونَے کیاہ
آبس اندر أسِتھ تہِ جُدأئی چھیہ حَبابس
تابس اندر صوفی کراں تدبیر ونَے کیاہ
Singer: Nazir Nishati
Kalaam: Nisar Sufi
Nisar Ahmad Sufi: • Nisar Ahmad Sufi