Рет қаралды 19,531
Мұрат Кенжебаевтың «Өшпенділік пен мейірім» әңгімесі шынайы, өмірде болған оқиға негізінде жазылған.
Автор біз өмір сүріп отырған заман күйін, қоғам шындығын ешбір қоспасыз баяндайды. Аталмыш туынды еліміздегі дәл қазіргі кезеңдегі өзекті мәселелерді қозғай алуымен де құнды. Атап айтсақ, тұрмыстық зорлық-зомбылық. Бұл - Қазақстандағы ең үлкен мәселелердің бірі. Тіпті әлемдік тұрғыда алаңдатушылық туғызған еліміздегі орын алған қайғылы жайт бәрімізге де белгілі. БҰҰ дерегінше, елде жылына кемі 400 әйел тұрмыстық зорлық-зомбылықтан қаза табады. Сонымен қатар, су тасқыны белең алған күрделі ел ахуалы да автор қаламынан тыс қалмаған. Қаламгер осы жайттың барлығын баяндай отырып, адами құндылықтардың маңызын жеткізе білген. Мал-мүлікке, байлық пен мансап буына мастанбай, шынайы да адал өмір сүруді, теріс әрекет пен зиянды қылықтардан, ащы судан аулақ болуды, өзгені сыйлай білуді, қажет кезде кімге болса да қолұшын созып, жәрдем беруді насихаттайды.
Қорыта келе айтарымыз, автор аталмыш шығармада дүниеқоңыздық пен пайдакүнемдікке, жауыздық пен жемқорлыққа, өтірік пен өшпенділікке қарсы қалам сілтейді. Оқырманын жүректің асылдығын, оның тазалығын сақтай білуге, өзіне және өзгеге мейірімділік танытып, адамдықтың ар шыңында кемелдікке ұмтылуға шақырады.