Рет қаралды 395
Belarus Respublikasynyň Minsk şäheriniň Sport köşgünde Wiktor Liwensewiň ýadygärligine bagyşlanan boks boýunça XX ýubileý halkara ýaryşy tamamlandy.
Halkara ýaryşa Türkmenistandan, Belarusdan, Russiýadan, Täjigistandan, Gyrgyz Respublikasyndan, Gazagystandan, Hytaýdan hem-de Kongodan iň güýçli türgenler gatnaşdylar. Olar medallar toplumynyň 20-si (12-si erkekleriň , 8-si bolsa zenanlaryň ýaryşlaryna degişli) ugrunda ringe çykdylar.
Türkmen türgenleri ýaryşyň 5 medalyna eýe çykdylar. Şolardan biri altyn, ikisi kümüş, ýene ikisi bolsa bürünç medallardyr.
71 kilogram agram derejesinde ýokary derejedäki taýýarlygyny görkezen Baýram Nurmuhammedow altyn medala eýe boldy we ýaryşyň iň gowy türgeni diýlip yglan edildi.
Kümüş medallara zehinli boksçularymyz Saparmyrat Ödäýew (63,5 kg agram derejede) hem-de Nurýagdy Nurýagdyýew (80 kg) mynasyp boldular.
Türkmen ýygyndysyna bürünç medallaryna guwanmak hem miýesser etdi. Guwanç Ahmedow (57 kg) bilen Muhammet Babaýew (75 kg) hormat münberiniň üçünji basgançagyna çykmagyň hötdesinden geldiler.
Bu ajaýyp netijeler zenanlar ýygyndy toparymyzyň baş tälimçisi Tenilbek Jumakulowyň hem-de ýygyndynyň uly tälimçisi Ýazmuhammet Pazzyýewiň irginsiz yhlasynyň netijeleridir.