ဦးကျော်မိုးထွန်း လုပ်ကြံစေခိုင်းမှု နောက်ကွယ်က ဦးအေးကိုဆိုတာ ဘယ်သူလဲ

ဦးကျော်မိုးထွန်း လုပ်ကြံစေခိုင်းမှု နောက်ကွယ်က ဦးအေးကိုဆိုတာ ဘယ်သူလဲ (ရုပ်/သံ)
ဧရာ၀တီ၊ စက်တင်ဘာ ၁၊ ၂၀၂၁
ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုးထွန်းကို အသက်အန္တရာယ်ပြုဖို့ ခိုင်းစေခဲ့သူဟာ (အေ ကေ) လို့ လူသိများတဲ့ စီးပွားရေးလုပ်ငန်းရှင် ဦးအေးကို ဖြစ်တယ်လို့ အမေရိကန် ပြည်ထောင်စု စုံစမ်းစစ် ဆေးရေးဗျူရို (FBI) ရဲ့ ထိန်းသိမ်းခြင်းကို ခံထားရတဲ့ ဖြိုးဟိန်းထွဋ်က ထွက်ဆိုခဲ့တယ်လို့ သိရပါတယ်။
အသက် ၆၀ ဝန်းကျင် ရှိနေပြီဖြစ်တဲ့ ဦးအေးကိုဟာ ကမ္ဘောဒီးယားနိုင်ငံမှာ လောင်းကစားရုံကြီးတွေ ဖွင့်လှစ် ထားပြီး၊ ထိုင်းနိုင်ငံမှာ နေထိုင်တဲ့ မြန်မာစီးပွားရေး လုပ်ငန်းရှင်တွေအကြား လူသိများသူ ဖြစ်သလို၊ မြန်မာ စစ်ခေါင်းဆောင်တွေအတွက် ရုရှားနိုင်ငံက တိုက်လေယာဉ်၊ ဟယ်လီကော်ပတာနဲ့ စစ်လက်နက်တွေ ဝယ်ယူပေးခွင့် ကိုယ်စားလှယ် ရရှိထားသူ သူဌေးကြီး ဦးတေဇနဲ့ ရင်းနှီးကျွမ်းဝင်သူလည်း ဖြစ်ပါတယ်။
သူ့ကို ဘန်ကောက်မြို့မှာရှိတဲ့ မြန်မာစစ်ဘက်ဆိုင်ရာ အရာရှိတွေနဲ့ စီးပွားရေး လုပ်ငန်းရှင်တွေ၊ သံတမန် တွေ ကစားလေ့ရှိတဲ့ ဂေါက်ကွင်းတွေမှာ မကြာခဏ တွေ့ရလေ့ရှိပါတယ်။
ဦးအေးကိုဟာ ထိုင်းနိုင်ငံ ဘန်ကောက်မြို့က စစ်ကောင်စီနဲ့ အလွန်နီးစပ်ပြီး လုံခြုံစိတ်ချရတဲ့ နေရာ တနေရာ မှာ ပုန်းအောင်းနေကြောင်း ဧရာ၀တီက စုံစမ်းသိရှိရပါတယ်။
လက်ရှိမှာ သံအမတ်ကြီး ဦးကျော်မိုးထွန်းကို လုပ်ကြံမှု နောက်ကွယ်က ကြိုးကိုင်သူကို ထိုင်းတော်ဝင် ရဲတပ်ဖွဲ့နဲ့ ထောက်လှမ်းရေး အရာရှိတွေကလည်း ရှာဖွေနေတယ်လို့ ဧရာ၀တီက စုံစမ်းသိရှိရပါတယ်။
#WhatsHappeningInMyanmar
#RejectMilitaryCoup