«Վերնատուն»․ Տարիքի մասին մոռանում ես, երբ սիրած գործով ես զբաղվում․ Հարություն Խաչատրյան 13.01.2025

Կինոռեժիսոր, վավերագրող, ՀՀ ժողովրդական արտիստ Հարություն Խաչատրյանը օրերս նշեց իր 70 -ամյակը։
«Տարիքի մասին միշտ մոռանում ես, երբ աշխատանքի մեջ ես ու քո գործին նվիրված։ Ինձ մոտ բավական էներգիա և ցանկություն կա աշխատելու», - ասում է կինոռեժիսորը։
Հարություն Խաչատրյանը խոսում է մասնագիտությունն ընտրելու դրդապատճառների, հիասթափությունների, ձախողումների ու հաջողությունների, նկարահանած ֆիլմերի թեմաների ու մտահոգությունների մասին։
Պատմում է, որ մեծ դժվարությամբ է ընդունվել ինստիտուտ, իսկ ընդունվելուց հետո լուրջ և խորությամբ է ուսումնասիրել կինոն։
1981 թվականին նկարված «Մեր թաղի ձայները» դիպլոմային աշխատանքը չի պահպանվել, ասում է ավելի ուշ նկարված «Կոնդ» ֆիլմը, դիպլոմային աշխատանքի այլ տարբերակն է, որը Հայաստանի կինեմատոգրաֆիստների կողմից չընդունվեց։
Նրան մեղադրում էին ոչ պրոֆեսիոնալության և հայ ժողովրդին վարկաբեկելու մեջ։ Ֆիլմի ճակատագիրը փոխվեց, երբ ընկերներով այն գողացան լաբորատորիայից և Կիևի փառատոն տարան։
Կիևում արժանանալով գլխավոր մրցանակի, այն ցուցադրվեց և մրցանակների արժանացավ նաև Մոսկվայում, Թբիլիսիում, Մյունխենում և այլուր։
«Ես նկարում եմ թեմաներ և պատմություններ, որոնք ինձ անհանգստացնում են։ Իմ ֆիլմերը ուրախացնելու և զբաղեցնելու համար չեն, դրանք մարդու ճակատագրի, երկրի ճակատագրի մասին են, որոնց շուրջ ես կուզեի, որ հանդիսատեսը մտածեր, անհանգստանար, ելքեր գտներ, խոսեր դրա մասին։ Իմ ֆիլմերը մի քիչ տարբերվում էին այն ֆիլմերից, որոնք Հայաստանում սովոր էին նկարելու։ Դրանք կիսադոկումենտալ, կիսախաղարկային, կիսապոետիկ և կիսաիրական էին», - ասում է Հարություն Խաչատրյանը։
Կինոռեժիսորը բարձր է գնահատում կինոյով զբաղվող կանանց ակտիվությունը։ «Էսօր կանայք մեծ հաջողություններ են ունենում կինոյում, առաջներում երբեք չեն ունեցել։ Կանայք շատ հետաքրքիր դոկումենտալիստներ են ինձ համար, որովհետև շատ նուրբ են, շատ հետաքրքիր հայացք ու անհանգստություններ ունեն։ Իրենց նկարած ֆիլմերը աշխարհով մեկ ցուցադրվում են»։
Կինոռեժիսորի երազանքը ազատ կինոդպրոց հիմնելն է։ «Ուզում ենք ստեղծել ազատ կինոդպրոց, որը պետական կարգավիճակներից հեռու կլինի։ Ազատությունը շատ կարևոր է կինոյի համար։ Ես կարծում եմ, որ կգտնենք ֆինանսավորում, այդ դպրոցը ստեղծելու համար, որը լավ տեխնիկա, հնարավորություններ և լավ դասախոսներ կունենա»։