Acto de rúa en Fene polo dereito a auga( Comunicación de Guerrilla)

Os mozos e mozas de 4º do IES de Fene quixeron denunciar ante a súa veciñanza que o mar está cheo de lixo e contaminación. Para facelo montaron na Praza Verde o pasado 30 de outubro unha peixería na que en lugar de vender pescadas, sardiñas, ou xurel, o que ofrecían era lixo. Lixo de proximidade e ben fresquiño xa que está recollido por eles mesmos nas praias e no propio concello.
O alumnado fenés ideou esta acción, tras o paso por un obradoiro previo de comunicación de guerrilla impartido por AGARESO, coa finalidade de concienciar á súa veciñanza sobre como o lixo e a contaminación que hai nos océanos pon en perigo a supervivencia dalgunhas especies emblemáticas para a nosa gastronomía. A comunicación de guerrilla é unha técnica comunicativa que busca xerar impacto e conciencia social, utilizando o espazo público para provocar unha reflexión na cidadanía.
A acción que ten como obxectivo concienciar á súa veciñanza sobre o lixo que desbotamos, especialmente no mar, forma parte do proxecto europeo ‘People & Planet: un destino común’ impulsado polo Fondo Galego de Cooperación e Solidariedade coa colaboración do Concello de Fene.