Рет қаралды 16,902
ಕರ್ನಾಟಕ ಹುಟ್ಟಿದ ದಿನದಿಂದಲೂ ರಾಷ್ಟ್ರೀಯತೆಗೆ ಪೂರಕವಾಗಿಯೇ ತನ್ನ ತಾನು ರೂಪಿಸಿಕೊಂಡಿದೆ. ದಕ್ಷಿಣದ ರಾಜ್ಯಗಳೆಲ್ಲ ತಮ್ಮತನವನ್ನು ಕಾಪಾಡಿಕೊಳ್ಳಲು ರಾಷ್ಟ್ರದ ಉನ್ನತಿಯ ಚಿಂತನೆಯನ್ನು ಕೈಬಿಟ್ಟಾಗ ಕರ್ನಾಟಕವೊಂದೇ ಭಿನ್ನವಾಗಿ ನಿಂತದ್ದು. ಇದು ನಮ್ಮ ಹಿರಿಯರ, ಪೂರ್ವಜರ ತಪಸ್ಸಿನಿಂದ ನಮಗೆ ಸಿದ್ಧಿಸಿದ ವರ. ಆದರೆ ಈ ಕಾರಣಕ್ಕಾಗಿಯೆ ಅನೇಕ ಬಾರಿ ಕರ್ನಾಟಕ, ಕನ್ನಡಗಳು ಅಸಡ್ಡೆಗೆ ಒಳಗಾಗುತ್ತವೆ. ನಮ್ಮನ್ನು ನಗಣ್ಯವೆಂದು ಭಾವಿಸುವ ರಾಷ್ಟ್ರದ ಇತರೆ ಮಂದಿ ದಕ್ಷಿಣದ ಬೇರೆ ರಾಜ್ಯಗಳನ್ನು ಗೌರವಿಸುತ್ತಾರೆ ಮತ್ತು ಅವರಿಗೆ ಬೇಕಾದ್ದನ್ನು ಕೊಡುವ ಪ್ರಯತ್ನವನ್ನೂ ಮಾಡುತ್ತಾರೆ. ನಮ್ಮ ರಾಷ್ಟ್ರಪ್ರೇಮ ದೂರದಿಂದ ನೋಡುವವರಿಗೆ ಅಭಿಮಾನ ಶೂನ್ಯತೆ ಎನಿಸಿಬಿಡುತ್ತದೆ. ಹೀಗಾಗಿಯೇ ನಮ್ಮನ್ನು ನಾವು ಮತ್ತೊಮ್ಮೆ ಬಲವಾಗಿ ಬ್ರ್ಯಾಂಡ್ ಮಾಡಿಕೊಳ್ಳುವ ಅವಶ್ಯಕತೆಯಿದೆ. ನೆಲ, ಜಲ, ಭಾಷೆ, ಸಂಸ್ಕೃತಿ ಇವುಗಳ ಕುರಿತು ನಾಡಿನ ಇತರೆ ಜನರಿಗೆ ಮನದಟ್ಟು ಮಾಡಿಸುವ ಅವಶ್ಯಕತೆಯಿದೆ.
ಈ ಹಿನ್ನೆಲೆಯಲ್ಲಿಯೇ ಇಲ್ಲಿನ ಅಪರೂಪದ ತಾಣಗಳು, ಸಂಗೀತ, ಶಿಲ್ಪಾದಿಯಾಗಿ ಇತರ ಕಲೆಗಳು, ಇಲ್ಲಿನ ವ್ಯಕ್ತಿಗಳು, ಸಾಹಿತ್ಯ ಕೃತಿಗಳನ್ನೆಲ್ಲ ಇಲ್ಲಿನ ಜನರಿಗೆ ಮತ್ತೊಮ್ಮೆ ಪರಿಚಯಿಸುವ ಮತ್ತು ನಾಡಿನ ಇತರರಿಗೂ ಆಸಕ್ತಿ ಹುಟ್ಟಿಸುವಂತೆ ಮಾಡುವ ಪ್ರಯತ್ನ ಆಗಬೇಕಿದೆ.