Рет қаралды 42,421
Dilberê îro seher avête cergê min du dox
Yek li sîne yek li dil da lew ji min tên ax û ox
Ah û oxên min ji dil ten lê ji ber tîra qizil tên
Yan ji kovanên di kul tên jê dizêt her xûn û zox
Xûn ji dil co co rewan tê wek ‘eqîq û erxewan tê
Lê ji dest selwa ciwan tê ew şepala şeng û şox
Ew şepala şox û şeng e kafira rom û fireng e
Dame ber cotek xedeng e zalimê kuştim bi dox
Zalimê kuştim şepalê nazikê qencê delalê
Bûn hicaba zulf û xalê ‘îdek û ala û tox
Netrik û tayên bi rêşî ê di zer in pêve wêşî
Min du fêris dîn di pêşî murwet û însafî yox
Lew heriftim ez ji meylê şubhetê sehlê we seylê
Muhbet û ‘işqa di Leylê ez kirim yekser pilox
Dest nehêlim ez ji dînê şubhê Firhad û Şirînê
Wer ji ber ‘işq û evînê min di rê çit ev kilox
Sûhbeta çerx û sema tê wek Melê sed mubtela tê
Zemzem û ava heyatê muşterî sed şeyx û şox