КӨНЕДЕН ЖЕТКЕН ҚАЗЫНА

Қазақстан Республикасы Мемлекеттік Орталық музейі ежелгі және орта ғасырлар тарихын тереңдете зерттеуде дәйекті дерек көзі саналатын археологиялық материалдар коллекциясының бірден-бір қомақты қор орталығы. Алғашқы қазақ музейінің археологиялық қорының негізі 1831ж. әскери губернатор граф Павел Петрович Сухтеленнің бастамасымен Неплюев әскери училищесі жанынан ашылған «музеум» Орынбор жаратылыстану-¬тарихи музейінің және 1898ж. Жетісу статистикалық комитеті мүшелері құрған Верный қаласындағы Жетісу облыстық музейінің коллекциясынан құралды. Бүгінде музей қорында халқымыздың төл тарихы мен мәдениетін және оның әлемдік өркениетке қосқан үлесін айғақтауға мүмкіндік беретін 30 мыңнан астам археологиялық құндылықтар қордаланған. Құндылықтардың басым бөлігі республика аумағындағы археологиялық экспедициялар ізденістерінің жетістіктері. Музейдің археологиялық қорындағы сақ-усунь (үйсін) мәдениеті коллекциясы, негізінен, аталмыш мәдениет орталығының бірі - Жетісу аумағынан табылған ілкі олжалардан құралған.