«ҚЫРАН» ОҚЫТУ ОРТАЛЫҒЫ КЫЗ-КЕЛІНШЕКТЕРГЕ ТЕГІН БІЛІМ БЕРЕДІ

Бүгін Жібек жолы ауылдық округінде нәзік жанды кәсіпкеріміз Гүлмира Измаханова қыз-келіншектерге арналған тегін оқыту орталығын ашты.
Осы уақытқа дейін бірнеше кәсіптің басын игерген Гүлмира Измаханова сүйікті ісінің көкжиегін кеңейтіп, бүгін оқыту орталығының салтанатты түрде ашылуын жасады. Шараға Алматы облысы бойынша еңбек мобильдігі орталығының директоры Абылай Зуайда, Жібек жолы ауылдық округі әкімінің орынбасары Дәулетжан Модинұлы, «Атамекен» ҰҚП аудандық филиалының басшысы Орынбай Жанәділ, Жібек жолы ауылдық округінің ақсақалдар мен аналар кеңестерінің төрағалары Базаргелді Әнисов пен Азиза Ахметова және ауыл тұрғындары қатысты. Кәсіпкерге асқан табандылығы мен еңбекқорлығы үшін Орынбай Басарұлы Алғыс хат беріп, ыстық лебізін айтып, сәттілік тіледі. Ал Абылай Жұмабекұлы кәсіпкерлерге арналған мемлекеттік бағдарлама аясында Қарасай ауданы бойынша Мансап орталығы тарапынан тиісті қолдау көрсетілетіндігін жеткізді.
Айта кетейік, бұл орталыққа Қарасай ауданы Мансап орталығынан Қазақстан Республикасының еңбек нарығын дамытудың 2024-2029 жылдарға арналған тұжырымдамасы бойынша қысқа мерзімді тегін оқытуға 10 адам жіберіледі. Білім алушы ретінде үйде отырған қыз-келіншектер мен аналар қарастырылған. Оқыту орталығында сән салонының барлық қызметтері оқытылып, бірден іс-тәжірибеден өту мүмкіндігі бар. Сондай-ақ арулар сұлулық салонында жұмыс істейтін мамандықты 3 айда игеріп, диплом иеленіп, 60%-ы жұмыспен қамтамасыз етіледі.