كريستيانو رونالدو - قصة حياته التى لا تعرفها

فى السبعينات.. كان فى جندى برتغالى من ضمن القوات اللى بتشارك فى محاولة السيطرة على ثورة الشعب الانغولى فى افريقيا.. انغولا كانت مستعمرة برتغاليه لحد السبعينات.. المهم الجندى البرتغالى ده واللى كان اسمه دينيس افيرو.. اتأثر جدا بالحرب ومشاهدها المرعبة.. زمايله بيموتوا قدام عنيه.. والجيش اللى هو بينتمى له.. عمال يموت فى الشعب الانغولى المسكين.. مشاهد مرعبة قسمته نصين.. ومقدرش ينساها اللى باقى من حياته.. مبقاش قادر يعيش بذنب الناس اللى ماتت ولا منظر زمايله المصابين واللى راجعين البرتغال بعاهات مستديمة..
يعمل ايه يعمل ايه؟.. قرر انه يلجأ للخمر.. يسكر علشان ينسى.. وفضل يشرب ويشرب لكن مبينساش.. بل على العكس.. مشاكله كانت بتزيد كل يوم عن اللى قبله.. لأن مع ادمانه للخمور.. بقى يحتاج فلوس اكتر يشترى بيها الخمره.. وهو اصلا عاطل مبيشتغلش.. يتصرف ازاى؟.. بدأ يدور على أى حاجه يبيعها علشان يشترى خمره بتمنها.. هيبيع ايه طيب؟.. شاف ابنه اللى كان مهووس بالكورة.. كل يوم والتانى يجمع تيشرتات أصلية ممضيه من لاعيبة كرة القدم.. فبدأ كل يوم ورا التانى ياخد تيشرت يبيعه.. وبتمنه يشترى خمره علشان يسكر وينسى.. لكن للأسف سيدى المواطن.. لا قدرت الخمرة تنسيه.. ولا قدر يبطل الخمره.. ولا بقى عند ابنه أى تيشرتات علشان يبيعها..
تحصل المشكلة التانية امتى؟.. لما ابنه يعرف ان ابوه باع التيشرتات الممضية من لاعيبته المفضلين.. الولد انهار.. الكورة هى كل حياته.. والتيشرتات الممضية دى كانت الحاجه الوحيدة اللى بتهون عليه الفقر اللى عايشه.. وادمان بوه.. والمستقبل اللى مش باينله ملامح..
وسيدى المواطن أنا مش عايزك تظلم الأب.. لأنه باختصار عمل المستحيل علشان يوفر لابنه الحياة اللى بيتمناها.. كان بيشتغل أى حاجه وفى أى وقت علشان يلاقى فلوس يصرفها على ابنه ويوفر له احتياجاته.. لكن للأسف بعد إدمانه على شرب الخمر كان أى فلوس يكسبها من شغله.. يصرفها على شرب الخمر قبل ما يروح.. وطبيعى ان احتياجهم للفلوس كان ينعكس على حياتهم.. فكان الولد هو واخواته البنات.. كلهم بيناموا فى أوضة واحده.. وأمهم طول النهار بتطبخ وتبيع الأكل للناس علشان تقدر توفر تمن الأكل والعلاج اللى أبوهم مش قادر يوفره..
وفى وسط انشغال الأب بالإدمان.. والأم بالشغل علشان توفر احتياجات ولادها.. كان الولد بيقضى أغلب يومه فى الشارع.. لا حد بيقوله انت فين ولا بتعمل ايه؟.. ومن كتر حبه فى الكوره.. انضم لفريق النادى المحلى الموجود فى بلدهم.. حاجه كده زى مركز شباب عندنا.. كان وقتها عنده 6 سنين بس.. بتحكى أمه وبتقول كان موهوب جدا.. رجليه كانت بتحب الكورة والكورة بتحب رجليه.. لكن كانت عنده مشكله.. كان يرقص الفريق كله ويباصيها لزميله علشان يدخلها جون.. لكن لما زميله كان يطلعها بره أو تتصد منه.. كان يفضل يعيط زى اللى الطفل الصغير اللى تاه من أمه.. كان يعيط لمجرد ان الكورة اللى تعب علشان يرقص كل اللى قدامه ويقدر يوصلها لـ 18.. زميله مقدرش يدخلها جون.. للدرجة دى كان حاسس ان الكورة هى أمله الوحيد اللى مينفعش يخسره.. كان عايش على أمل ان الكورة هى اللى تنقذه من حياة الفقر اللى عايشها.. كان حاسس انه موهوب وموهبته دى هى اللى هتغير حياة اخواته وتريح امه من شغل البيوت وتنقذ ابوه من الادمان..
سيدى المواطن هى دى باختصار قصة حياة أسطورة كرة القدم كريستيانو رونالدو.. قبل ما يتحول لأغلى لاعب فى العالم.. أفضل لاعب كرة قدم على كوكب الأرض.. الولد الصغير اللى كان بينام مع اخواته فى اوضه ضيقه.. وابوه مدمن كحوليات.. وامه شقيانه علشان توفر لهم تمن العشا.. بقى أغلى لاعب كرة قدم على وجه الأرض..
المهم معداش وقت طويل على رونالدو فى الملاعب.. لحد ما الأندية بدأت تتخانق عليه.. وكان أهم ناديين طلبوا التعاقد معاه.. هما ناسيونال ماديرا المحلى وماريتيمو.. الكلام ده كان سنة 1995.. أبوه كان عاوزه يتعاقد مع ماريتيمو.. لكن اليوم اللى اتحدد فيه معاد قعدته مع الناديين.. محضرش غير نادى واحد وهو نادى ناسيونال ماديرا المحلى.. وبالتالى انضم له كريستيانو رونالدو.. لكن اللطيف هنا ان المقابل اللى دفعه النادى للتعاقد مع رونالدو مكنش فلوس.. كان شويه كور وشوية تيشرتات.. ووافق رونالدو ولعب للنادى.. بعدها بشوية وقت.. وقع مع نادى سبورتينغ لشبونه.. وكان المقابل ألف ونص جنيه استرلينى.. سيدى المواطن انت عارف المبلغ ده يعملو كام بالمصرى.. 34 ألف جنيه.. فلك أن تتخيل ان كريستيانو رونالدو أسطورة كرة القدم على كوكب الأرض.. أغلى لاعب فى العالم.. كان قيمة التعاقد معاه 34 ألف جنيه مصرى.. ربك لما يريد.. لذلك دايما أقولك اوعى تيأس.. معركتك الحقيقية مش فى الوصول.. معركتك الحقيقية فى الاستمرارية.. اوعى تصدق اللى يقولك ان الفرصة مبتجيش غير مرة واحده.. بالعكس.. انت اللى بتصنع فرصتك.. طول ما انت مستمر وبتحاول.. طول ما ربنا بيخلق لك فرص جديدة.. تفشل امتى.. فى نفس اللحظة اللى تقول فيها لنفسك خلاص أنا مش قادر.. انما غير كده شكليات..
المهم.. وبرغم انضمام كريستيانو للنادى الجديد وخلاص نقدر نقول انه احترف كرة القدم.. إلا إن أمه كانت حريصه جدا على تعليمه.. لازم كريستيانو يكمل تعليمه حتى ولو هيكلفنا فلوس احنا اصلا مش بنمتلكها.. هشتغل اكتر وهتعب اكتر علشان اوفر له فلوس تعليمه.. مفيش مشكلة.. فما كان من الولد إلا انه استجاب لأمه وكمل دراسته.. لكن فى يوم من الأيام.. تفاجئ أمه بالمدرسة بعتالها استدعاء ولى أمر.. تعالى بسرعه.. ..
من المصادر
bit.ly/3OzYPUq
bit.ly/3z9hReD
bit.ly/3ozre2h
#المواطن_سعيد #كريستيانو_رونالدو #جورجينا

[@Ahmed_Said]

هتفتكرنى سيدى المواطن ؟ 🤓

[@yehiatrojan8707]

انتا راجل محترم والله وتستاهل كل خير حجيبلك شقة فى الجيزة على النيل ان شاء الله

[@talaahmad638]

انا بتابع حضرتك من أولى ما فتخت القناة وبفتكر لما التلفون ضاع وجبت تلفون جديد اول حاجه عملتها بحثت على قناتك. 😂ياريت بقى تكمل حلقة الظاهر بيبرس بالله. 🙂

[@شغلاليوم-م9ض]

عليا النعمه مكانك مش هنا والله انا نفسي اقابلك ياعم

[@Mahmoud_Ali2005]

ادعيلي انت بس وليك الحلاوه

[@ahmedamrabdulrahman9822]

وربنا يا شيخ حلفتك بالغالي اعمل حلقات بالتسلسل ده ١- ليونيل ميسي ٢- محمد صلاح ٣- الحرب العالمية الثانية بالتسلسل والترتيب ٤- تاريخ مصر من اول ادم حتي الآن ادي افكار حلقات جديدة

[@read_to_me_a_book_with_samira]

الشخص صاحب الإرادة القوية قد تؤلمه وتكسر روحه أحيانا المواقف الصعبة لكنها مع الوقت تجعله شخص أقوى بفضل الله

[@anssahmed9287]

اي كلام حلو ده سميره من اشد متابعين لمراجعاتك جميله

[@gogomomo7593]

انا بعشق رونالدو وتقريبا شفت كل الافلام والحلقات المصورة عن قصة حياة رونالدو بس بصراحه دي اجمل حلقه انا شفتها عن قصة حياته أحسنت اخويا مواطن سعيد وطبعا عمرنا ما ننساك يا راجل يا محترم ❤👍🌹

[@deutsche4294]

كرستيانو كل يوم جهد لسنوااات وتعب ونظام غذائي قاسي وتدريب ساعات اكثر من المطلوب ووو، كلها اسباب المفروض تخلي اي شخص يحب الكرة يحترم ويقدر كرستيانو بعيدا عن الانتماء 👍❤️🙏

[@marwaqoura7804]

الأسطوره ❤بحبه من قبل ما أعرف قصته ،،بطل كبيييير قوي وأنسان جميل بمعنى الكلمه ،،حيفضل أسطورة الرياضه والانسانيه

[@majedab2019]

نعم يا ساده إنهو افضل لاعب في تاريخ كرة القدم❤️👏🏼

[@mahersalah2140]

قصة تحدي ....يرزق من يشاء بغير حساب....تحية تقدير لك من الجزائر

[@mohdmuhsin8018]

اقسم بالله تاثرت فعلا ف كلامك حقيقي دائما الي يسعى يلاقي هدفه ❤️❤️

[@ahmedamrabdulrahman9822]

وربنا يا شيخ حلفتك بالغالي اعمل حلقات بالتسلسل ده ١- ليونيل ميسي ٢- محمد صلاح ٣- الحرب العالمية الثانية بالتسلسل والترتيب ٤- تاريخ مصر من اول ادم حتي الآن ادي افكار حلقات جديدة

[@user-eg4ru3le5n]

اللاعب المفضل بالنسبه لي ، هذا الشخص مثال على الاصرار والطموح 👏🏻 في مقطع انتشر له وهو صغير ولسى في بداية طريقه سألوه مين افضل لاعب بالعالم قال انا ، طبعاً المذيع واللاعبين اللي جنبه ضحكوا على جوابه، هذا المقطع خلاني اكتشف بأنه الثقه بالنفس وقبلها الثقه بالله هي اللي حتوصلك لحلمك

[@90s-j3g]

كريستيانو قدوة متحركة الطموح و الأحلام لا حدود لها

[@adhamelansary4202]

الفيديو ده أنا بحييك عليه من كل قلبي لأنك بتوصل فيه رسالة كبيرة و عظيمة جدا لكل واحد عنده حلم عاوز يحققه شكرا ليك بجد

[@زنااركزناار]

سعيد استمر بتقديم قصص عن الناجحين في العالم وربي الحلقه ناااااار وفيها كميه اصرار ونجاح ومشاعر

[@naahmed5401]

الافضل في التاريخ 🐐

[@abdotag5792]

طب وربنا انا فرحت جدا بوصول الاشعار ده بجد والله ❤♥

[@MohamedAli-fx5gp]

ياريت تزود عدد الحلقات يا استاذ احمد وممكن تعمل حلقه عن رافت الهجان وشكرا لحضرتك

[@FatimaZahraa-en6zs]

شيء يعجبني في شخصية هدا الاعب هو انه غير ناكر للجميل مزال متفكر ناس لي وصلته وفتحتله الطريق ربنا يبارك له 🤲

[@salehhunaitem1073]

رائع رائع رائع اسلوب شيق ممزوج بروح الدعابة المعروفة عن اخواننا اامصرين…

[@magdatolba5769]

اهم حاجه ان الانسان يتقن شغله مهما كان بسيط

[@omarmagdy3367]

الCr7 لاعبي المفضل وافضل لاعب في التاريخ 🇵🇹❤️

[@TIGER_Mx0]

يو يو يو المواطن سعيد يا رباه الاسطوره التي لن تتكرر ثانيا يجب أنا ندعمو شكلي عامل زي المعلق صح 😂😂😂

[@mahmoudnaeem1498]

لا

[@TIGER_Mx0]

لا اي بس

[@mahmoudnaeem1498]

@@TIGER_Mx0 شكلك مش عامل زى المعلق

[@nasermohamed1069]

كريستيانو افضل لاعب في التاريخ

[@hanadiihanadii3146]

احلى ما في الموضوع المحتوى وطريقة شرحك 😍😍 والطاقة الايجابية

[@i4ore178]

افضل لاعب في تاريخ كرة القدم

[@alaaalqadi5809]

قد ايه الحلقه دي فرقت معايا .. جات لي وقت كان اليأس بدأ يدخل جوا قلبي في هدف بقالي سنين بجري وراه .. أن شاءالله هقف على رجلي من تاني وان شاءالله ربنا يكرم كل مكروب ومشتاق للفرج .. أحسنت

[@juwayriyajuwayriya]

رونالدو اسطورة في اللعب و في الاخلاق و الانسانية

[@Abdullah-od8fp]

مسيرة اسطورية مستحيل تتكرر لأي لاعب فعلاً هذة افضل لاعب على مر العصور

[@omargomaa3233]

الحلقه دية جايه في وقتها 💔😔 شكرا ليك 💙

[@simbamy4833]

انا اول مره اسمع قصه حياته بجد اللي بيتعب يستاهل يبقي افضل

[@gehaneldakhakhny65]

الحقيقه موش قادره اوصف لك احساسي وانا باستمتع بحلقاتك شااااااابوه

[@Dhammar]

حلقة للتاريخ😍

[@Ahmed_Said]

ايه أكتر حاجه استغربت لها فى حياة كريستيانو ؟

[@Amjad-by7ij]

صراحه ما تصورت انك تسوي حلقه عن هيك شخصيه تافهة💔💔💔💔

[@drmagedsleam2529]

بصراحه مش فاهم ايه غرضك في الكلام عن مارلين مونرو وفاتن حمامه وعمرو الشريف وبطاطس و الفاست فودز فين المحتوى الهادف سيدي المواطن

[@tahermostafa6447]

إنه مخلف أربع اطفال ولسه مش حاسس أنه لجوجينا😂

[@saifkhaled3792]

@@Amjad-by7ij 🤣🤣🤣

[@USPS5]

@@Amjad-by7ij فعلا كوره القدم شيءٍ تافهه اصلا

[@كُنرَاقِياً]

الدون اسطوره كره القدم افضل لعب في تاريخ كرة القدم

[@MGelysium]

مبدع وعبقري فى سرد القصص العظيمه والمفيده👌👌💚💚

[@amanyorabe860]

شكرا جزيلا أستاذ احمد ربنا يسعد قلبك ويبارك فيك زي مابتسعد قلوبنا بكلامك واسلوبك المحترم الراقي .... مع ان كريسيتانو اللاعب المفضل عند ابني ودائما يكلمني عنه لكن الحلقه فيها رسائل كثيره مهمه للشباب . ربنا يوفق كل شبابنا لما فيه الخير

[@tahermostafa6447]

أنا نفسي تعمل حلقة عن أسطورة من أساطير الصعيد وبسم الله ماشاءالله الصعيد مليانااا أساطير

[@MUHAMMAD_GHANI_315]

بِسْمِ اللّٰهِ الرَّحْمَانِ الرَّحِيمِ الْحَمْدُ لِلّٰهِ رَبِّ العَالَمينَ اللّٰهُمَّ صَلِّ عَلَىٰ سَيِّدِنَا مُحَمَّدٍ الْفَاتِحِ لِمَا أُغْلِقَ وَ الْخَاتِمِ لِمَا سَبَقَ نَاصِرِ الْحَقِّ بِالْحَقِّ وَ الْهَادِي إِلَىٰ صِرَاطِكَ الْمُسْتَقِيمِ وَ عَلَىٰ آَلِهِ حَقَّ قَدْرِهِ وَ مِقْدَارِهِ الْعَظِيمِ ❤❤❤❤❤❤❤❤❤❤❤❤❤❤❤❤❤

[@bargaouinaziha2833]

شكرا ابني الغالي المواطن سعيد على الدرس التحفيز لأصحاب المواهب

[@peonnerhirrari428]

تحليل جيد ومنطقي ومعلومات قيمة. حفظك الله ورعاك استاذ

[@-Yalla_Kora5299]

ف اوروبا بيساعدو الفاشل علشان ينجح وفي العرب بيكسرو الناجح علشان يفشل

[@tahermostafa6447]

المتألق دائما تحياتي 🤍🤍❤️ أخوك من أسيوط

[@kamelsh8058]

ربنا يوفقنا جميعا اللهم آمين آمين آمين يارب العالمين والصلاة والسلام على رسول الله صلى الله عليه وسلم. شكرا لك

[@GOOAL-7]

احبك فى قصص الصعود / استمر فى النوع دة يا مبدع

[@rahmafahmi1515]

انا طبعا بوجه اعجاب. الشديد ليك وكل الشباب المحترم المتعلم اللى بيوجه محتواه محترم وسط زمن التسيب اللى عايشين فيه ربنا يحفظكو ويحفظ مصر جميعا

[@احمدقنديل-س6س]

حضرتك انسان محترم جدا وانا شخصيا يستمتع جدا وبستفيد لما بشوف البرنامج بتاعك ربنا يوفقك للاستمرار❤

[@asmaasayed6558]

و بيستغربوا ليه بنحب الدون🥺💔

[@اللهمصلعلىسيدنامحمد-ع9ف]

بتحبيه ليه 😂😂

[@Jejekhater]

مش هنساك انت عظيم بجد❤

[@misssqz]

بصراحه لا نملك الا ان نضغط اعجاب حلقة ورا حلقة تدهشنا وتستاهل الخير

[@خالدالديب-د3ش]

والله كلامك جميل جدا وربنا يوفقك نجاح الى نجاح ان شاء الله 🤲

[@chalhzakariae5705]

ههه حقا افظل مواطن سعيد بارك الله فيك اخي تحية خالصة لك ولاخواننا المصريين 🇪🇬 من المغرب 🇲🇦

[@user-rg8ge2qr5x]

أحسنت يا كابتن حلقة بمكانها👏👏

[@راحتعليك-ط6ظ]

أفضل الأعمال الصلاة على محمد وآل محمد الطيبين الطاهرين وعجل الله فرجه ياكريم 🌹🌹🌹

[@hebakamal6440]

حلقه تحفيزيه من طراز رفيع وأداءك دائما مبدع يا أخى المواطن وبإذن الله افتكرك

[@mohamedelshazly7279]

ربنا يخليك و منتحرمش من نصايحك و يارب كلنا نبقى كرستيانو بشكرك جدا على مجهودك فى القناه

[@ph.muathyousef5029]

شخصية عظيمة فعلاَ جداً جداً جداً. مكافح. وطبعاَ هو أول ملياردير رياضي بالعالم

[@harithabbas7489]

مايكل جوردان وليبرون جيمس سبقوه وممكن في رياضيين ثانيين ورونالدو يمكن لحد الان ماوصل للمليار

[@fred0o272]

@@harithabbas7489 لا هو عدا المليار خلاص ..هو وصل للمليار وهو في اليوفي وفعلا هو اول مش رياضي عامة لكن اول لاعب كرة قدم في التاريخ يوصل للمليار وهو كمان لسه بيمارس اللعبة

[@harithabbas7489]

@@fred0o272 يستاهل واني كلت هالكلام وبداخلي حاس انو واصل بس كلت يمكن بعده لانه راتبه قوي وحساباته قوية اقوى حساب انستغرام بالعالم وفوكاها ماركة خاصة بي ومتحف وفنادق وكلشي عنده رجل اعمال يعتبر

[@fred0o272]

@@harithabbas7489 من ناحية الكورة فحصل على ٦٥٠ مليون وتكملة المليار كانت من التسويق والاعلانات والماركة بتاعتو وفنادق والسوشيال ميديا والحاجات دي

[@ساساسو-ش8ع]

من جد مستوى رائع وجميل في الأداء مع خفة دم زي العسل الله يوفقك ويوصلك للمليون

[@ahmedzawal4766]

من افضل مقدمين محتوي ممتاز جدااا طريقتك و المحتوي حلو اووي ومفيد ومحايد اتمني شركات الانتاج المحترمة تعملك برنامج كبير اتمنالك المزيد من النجاح و التوفيق

[@أحمدعبدالله-ر8ط8ر]

سبحان العاطي الوهاب وسبحان مقثم إلا رزق❤❤❤

[@M.Alsubaihi84]

انت ابداااااااااااااااااااع

[@عبدوهالهارش]

لما ربنا يريد ينجحنا يبعث لنا واحد مثلك.. اسعدك الله دنيا واخره اخوك من اليمن ... عدن ابين

[@محمدمصطفي-ص1د2ك]

سبحان الله وبحمده سبحان الله العظيم اللهم صل وسلم على نبينا محمد صل الله عليه وسلم

[@SONICC_808]

ونعمه بالله

[@blackwolf9844]

والله يا استاذ احمد الواحد بيتمنى من ربنا ان يكون فى اعلام محترم فى بلدنا وعشان احنا عشمنا فى ربنا كبير اوى ومتاكدين من كرمه . ان شاء الله بسعه الرزق اوعدك انى هفتحلك مشروع اعلامى محترم يفيد البلد دى وأهلها لأنك مثال مشرف بجد .

[@mahmoudalisolimanali4392]

كل من يتكلم عن الاسطورة فهو اسطورة بالفعل

[@karimalnajar4449]

الله يفتح عليك

[@fawzy14]

الله عليك

[@mohamedsaad4719eljoker]

اللهم صل وسلم وبارك على محمد وآل محمد

[@samehhosny1245]

انا من أشد المعجبين بالمادة الي حضرتك بتقدمها بالتوفيق دايما ... بس طلب بسيط ياريت لوحضرتك تراجع آيات القرآن الكريم وقرأتها بطريقة صحيحة

[@MohamedEssam-mo6bq]

آلََلََــــــــــــــــــــهّّمًًَّ_صَّّلََِّ_وٌٌسَِِـــلََِّمًًْ_وٌٌَبًًَآرِکْ🩷 عٌٌلََﮯ نَِِبًًِيََِّنَِِـــآ🩷ﷺمًًُحًًمًًَّـــــــــــــــــــــــــدٍٍﷺ🩷وٌٌعٌٌلََﮯ آلََهّّ وٌٌصّّحًًبًًهّّ أجّّمًًعٌٌيََنِِ.🩷 رزقنا اللــــــــــه وإياكم ﷺشفاعته ومرافقته في الجنة.ﷺ ﷺ🩷םבםב🩷ﷺ

[@shabibbh2706]

شكرن على التحفيز

[@حنانمصطفيالشيخ]

ماشاء الله عليك اسلوبك روعه ربنا يحفظك ويجعلك في كل خطوه فلاح

[@omimahassan7373]

انت انسان جميل جدا وأسلوبك رائع وطريقة سردك للأحداث لذيذة

[@skofcomedia7387]

CR7 IS THE BEST PLAYER

[@خالدالديب-د3ش]

عاش والله ❤️ كل الدعم ❤ من الزملكويه ❤❤

[@hanihanna7394]

ممتاز يا احمد كالمعتاد عشره على عشره و نجمة اجمل كلمات الحلقه سيدى المواطن ربنا موجود سيدى المواطن ربنا يوفقك سيدى المواطن ثق بنفسك غيرك يا احمد يقعد الحلقة كلها قال الله و قال الرسول و ايات قرأنية و احاديث بغض النظر عن إن الإنسان عليه دور و شغل لازم يعمله الدنيا مش بس قعاد فى مكان العبادة 24 ساعة فى اليوم

[@ابوخالد-ل9ن2د]

عظمة على عظمة يابو حميد انت اللي اسطوره والله

[@خالد-ه7س7س]

جزاك الله خيرا الله يكتب إلي فيه الخير بالتوفيق

[@rachidboukhari8018]

أستغفر الله العظيم و أتوب إليه 🤲🤲

[@iiCr.7]

الكل اتفق على حب Cr7 💛.

[@pureOwarrior]

المواطن سعيد اشكر حضرتك على الرقي في تقديم الحلقات وايجازها في جمل تفي بالمطلوب وهو ايصال الوعي في المجتمع بستاذن حضرتك تنزل حلقة عن الجيش وامكانياته من ناحية القوة وما تم انجازه في الحقبة الحالية. شكرا لحضرتك

[@عمرشراب-ف7ط]

بس ياريت لو تطفي موسيقى الخلفية لما تقرأ ايات القرآن ويبقى احسن لو تطفيها تماماً. وشكراً

[@ashrafmohamed-ev7ts]

تستاهل كل خير انت راجل كبارة

[@ghanibentrad7203]

تستاهل كل خير ❤❤❤❤

[@ابوعليماهر-ل7ل]

روووووووعه بكل المقاييس هذا الفيديو مليئ بالمعلومات الهامه التي تخص نجمي الاول الدووون شكرا لك ايها الرجل السعيد دائما عاشق تراب مصر من اليمن السعيد ثغرها الباسم عدن

[@hazemrefaat1474]

لااله الا الله

[@khalidothman6560]

11:40 كلمة "أنا أعرف ناس اتعرفوا على بعض بعد الجواز" قتلتني ضحك، عسل يا سعيد وربنا 😂😂🤣🤣

[@monahelmi212]

ربنا يوفقنا ايها المواطن المصري السعيد وتشتري جزيره لمعجبينك واللي بيحطولك لايكات😂

[@fawazmohammed5644]

مبدع مشاء الله 🌹🌹

[@خضرمحلي]

المواطن سعيد لك كل امنياتي بالمزيد من التوفيق إن شاء الله 👏👏👏👍😁

[@سليمالمسلمي-ج2ذ]

والله العظيم والله العظيم تاني انا داخل علي مشرؤع وكنت خايف جدا وصليت وقولت يارب اديني اي علامه اكمل ولا واول مدخل علي اليوتيوب القيك في وشي واسمع منك الكلام دا حفزتني جدا جدا وقولت اكيد دي علامه من ربنا اني اكمل شكرا 🌹جدا جدا جدا

[@HassanHasona-bc5vm]

سبحان الله وبحمده سبحان الله العظيم

[@rabieragab8198]

مش قادر ما علقش تحياتي للجميع وتحية خاصة إلى المواطن سعيد من فضلكم صلوا على الحبيب النبي محمد صلى الله عليه وسلم اللهم ارحم موتانا و أشفى مرضانا

[@NadiaMostafa-z9e]

بصراحة حضرتك رائع وطريقة سرد مرتبة وجميلة والاجمل تركيزك علي الهدف من المحتوي حضرتك نموذج رائع لأي صانع محتوي جزاك الله خيرا ً على مجهودك

[@seifnady8053]

انا بحبك قوي و متابعك بشكل كبير😍😍😍

[@yousefsaied8972]

قصة معبرة من الافضل في تاريخ الكورة شابووه المواطن سعيد 👌👏👏👏👏

[@sameerhussain5402]

الله يهديه يدخله الاسلام آمين يارب العالمين 🤍

[@fafybehiry39]

سيدي المواطن انت جميل وبتدي طاقة إيجابية حلوة 💐💐 ربنا يوفقك

[@youssefashraf702]

حلقة ولا أعظم كالعادة من حلقاتك يا استاذ احمد و رسالة الفيديو دي فعلا احنا كنا في أمس الحاجة ليها....انت من أحسن اليوتيوبرز على مستوى العرب فعلا و محتواك هادف كل مرة و نفسي اقدر اشكرك شخصيا و اجبلك جزيرة اكبر 😁 ان شاء الله يوما ما في ظل معافرتنا للوصول لأحلامنا هحاول اتواصل معك شخصيا و هتشوف بنفسك ماذا صنع محتواك بعد كرم و توفيق الله عز وجل ❤️

[@AhmedElSayed-ed1fv]

عظمة ياعم

[@tdhtbdkvkc3952]

جزاكم الله كل خير على هذا المجهود الرائع و المميز

[@eng.mohamedbadawy7211]

اقسم بالله انا بنام ع صوتك ياريت نزود الحلقات شوايه تحياتي لحضرتك

[@abdelkawy68198]

من أجمل الحلقات