Рет қаралды 251,621
పూర్వం మంచి పరిపాలకుడైన ఒక మహరాజు ఉండేవాడు. ఆయనకు తత్త్వ జిజ్ఞాస ఎక్కువ. ఒకనాడా మహరాజు గారికి ఉదయం లేవగానే మనస్సులో మూడు ప్రశ్నలు ఉదయించాయి. దానితో ఆయన ఆ రోజు కొలువులో తన ప్రశ్నలను సభలోని పండితులందరికీ వినిపించాడు. అవి..
ఒకటి. దేవుడు ఎక్కడ ఉన్నాడు?
రెండు. దేవుడు ఏ వైపు చూస్తున్నాడు?
మూడు. దేవుడు ఇప్పుడేం చేస్తున్నాడు?
ఇలా మూడు ప్రశ్నలూ అడిగి, వాటికి సమాధానం చెప్పమన్నాడు. పండితులంతా తలా ఒక సమాధానం చెప్పసాగారు. వాటికి శాస్త్రాల్లోని ఎన్నో దృష్టాంతాలు కూడా చూపించసాగారు. కానీ రాజుగారికి మాత్రం ఆ జవాబులేవీ సంతృప్తి కలిగించడంలేదు. అలా ఆ చర్చ సాయంత్రం వరకూ కొనసాగింది. రాజుగారికి అసహనంతో పాటూ కోపం కూడా వచ్చింది. దానితో ఆయన “మీకు మూడురోజులు సమయం ఇస్తున్నాను. ఈలోగా మీరీ ప్రశ్నలకు నాకు సంతృప్తి కలిగేలా సమాధానాలు చెప్పాలి. లేదంటే.. రాజ్యబహిష్కరణ తప్పదు” అని చెప్పి సభ చాలించి వెళ్లిపోయాడు. పాపం ఆ పండితులంతా నిశ్చేష్టులైపోయారు. వారికేం చెయ్యాలో కూడా తోచలేదు. రాజు ధర్మాత్ముడే. కానీ ఆయనకు ప్రథమ కోపం. మూడురోజుల్లో కనుక ఆ ప్రశ్నలకు సమాధానాలు చెప్పకపోతే తామిక తమ ఇళ్ళూ వాకిళ్ళకు నువ్వులు వదులుకొని దేశం విడిచిపెట్టి పోవాల్సేందే అనుకుంటూ దుఃఖించసాగారు. అలా అందరూ ఆనాటికి తమతమ ఇళ్ళకు వెళ్లిపోయారు. ఎవ్వరికీ నిద్రన్నదే పట్టలేదు. అలా రెండు రోజులు గడిచిపోయాయి. ఆ రెండవనాటి సాయంత్రం వేళ ఒక పండితుడు నదీతీరంలో కూర్చుని “ఇక రేపటితో ఈ రాజ్యానికి నాకు ఋణం తీరిపోతుంది” అంటూ విలపించసాగాడు. అప్పుడే అటుగా వస్తున్న ఒక సాధువు అలా దుఃఖిస్తున్న ఆ పండితుణ్ణి చూశాడు. అతని దగ్గరకు వెళ్లి. “నాయనా ఎందుకేడుస్తున్నావ్” అన్నాడు. ఆ పండితుడు కళ్ళు తుడుచుకుంటూ జరిగినదంతా చెప్పాడు. ఆ సాధువు చిరునవ్వు నవ్వి, “నీకేం భయంలేదు. రేపు సభలో నా తరపున వవ్చే వ్యక్తి ఆ ప్రశ్నలకు జవాబులిస్తాడు. ఇక నీవు నిశ్చింతగా ఉండు. అని చెప్పి వెళ్లిపోయాడు. దివ్యతేజస్సుతో వెలిగిపోయే ఆ సాధువు మాటలకు ఆ పండితుడికి కాస్తంత ధైర్యం వచ్చింది. కానీ ఏదో మూల బెరుకు మాత్రం అలానే ఉంది. అతడా సాధువు పాదాలకు నమస్కరించి ఇంటికి వెళ్లిపోయాడు. ఆ విషయాన్ని తన తోటి పండితులకు కూడా కబురు పంపించాడు. మూడవ నాడు సభ మొదలయ్యింది. నగరంలోని ప్రజలంతా కూడా పండితులు ఏం సమాధానాలు చెబుతారో విందామని తండోపతండాలుగా వచ్చారు. రాజుగారు సింహాసనం మీద ఠీవీగా కూర్చొని మీ సమాధానాలు చెప్పండంటూ ఆదేశించారు. అప్పుడా పండితుడు పైకి లేచి, మహారాజా ఈరోజు మా తరపున మరో వ్యక్తి మీ ప్రశ్నలకు సమాధానాలిస్తాడు. అందుకు అనుమతించవలసిందిగా ప్రార్థిస్తున్నాం అన్నాడు. రాజు దానికేముంది అంటూ సరే అన్నాడు. అందరూ ఆ వచ్చే వ్యక్తి కోసం ఎదురు చూడసాగారు.