Рет қаралды 25,776
Şeir: Musa Yaqub - Bir günah sənin, bir günah mənim
Səsləndirmə: Musa Yaqub
Musiqi: Aqşin Əlizadə - Hüzn valsı
Biraddımla'ya KZbinda abunə olmaq: bit.ly/3gsJpm1
Biraddımla'nın sosial şəbəkə ünvanları:
Instagram: bit.ly/3gsKkms
Facebook: bit.ly/3GoODKl
TikTok: bit.ly/3r3sAHt
Telegram: bit.ly/3unQMn8
E-poçt: biraddimlayol@gmail.com
MUSA YAQUB - BİR GÜNAH SƏNİN, BİR GÜNAH MƏNİM
Bir gözün mən əydim, bir gözünü sən,
Niyə narazıyıq bu tərəzidən?..
Sən çeşmə qurudan, mən ağac kəsən
Bir günah sənindir, bir günah mənim.
Bu südə su qatıb hərə bir qaşıq,
Arını şəkərə dadandırmışıq.
Bazarın yağı şor, balı qarışıq
O mətah sənindir, bu mətah mənim.
Söz sözə gələndə sən nəfsi qıran,
Mən dünya malına göz yumub duran.
Amma ayrılıqda daşı da yaran,
Bir tamah sənindir, bir tamah mənim.
Görürük bu silah vurmur hədəfə,
Vurmur, ha atırıq mininci dəfə.
Əlimiz dolaşıb düşüb kələfə,
Bu əl gah sənindir, bu əl gah mənim.
Qoyma yalanımız qalxsın ayağa,
Hay deyirik, haya gəlmirik, qağa.
Sözü güləşdirib, əhdi danmağa,
Bir vallah sənindir, bir vallah mənim.
Yamanca ustayıq hər ehtiyatda,
Dostluq şirnisi də dilimiz altda.
Amma yaman günə əlimiz altda
Bir silah sənindir, bir silah mənim.
Ömür təsəllidi, ümid sabahdı,
İndi öz xeyrinə çoxu agahdı.
Hərə dolanışa bir cür nigahdı,
Bir nigah sənindir, bir nigah mənim.
Orda bulanıq su hopur torpağa,
Burda üzə çıxıb dönür bulağa.
Hələ ki, vaxtımız var durulmağa,
Bir sabah sənindir, bir sabah mənim.
1985
Musa Yaqub:
“... Bir şeirim var: “Bir günah sənindir, bir günah mənim”. Günah bir az özümüzdədir, bir az da zamanda. O vuruşların, döyüşlərin, bir-birinə acıq vermək istəyənlərin pislikləri Azərbaycana da təsir edib. Mən istəməzdim belə olsun, camaat narahatdır. Azərbaycanda insanlar həyəcanlıdır, dolanışıq bir az yaxşı deyil. Bəziləri ölkənin qədrini bilmir, ancaq öz varını, sərvətini düşünür, öz dövlətini artırmağa çalışır. Bu ölkə üçün də ziyanlıdır.
Bir gözünü sən əydin, bir gözünü mən. Niyə narazıyıq bu tərəzidən? Sən çeşməqurudan, mən ağackəsən. Bir günah sənindir, bir günah mənim...” Biri çeşmə qurudur, biri ağac kəsir, biri yaradır, biri də dağıdır. Günah hökumətdədir, ya vətəndaşda, nə fərqi var? Biz hamımız vətəndaşıq. Ən böyük dərd budur: “Sünbül-sünbül tarladan bir dən sənin olmasın, adın vətəndaş olsun, vətən sənin olmasın”. Günahın bir ucu dövlətə düşür təbii ki...
Mən dünyanın hər işini hörmətdə-izzətdə, bir-birini başa düşməkdə, anlamaqda görürəm. Dünyanın hər neməti ola, dünya dümbədüz ola, sünbüllərimiz bitə, ruzimiz ola, çeşmələrimiz qaynaya, amma arada məhəbbət, hörmət olmasa, bir-birini anlamaq olmasa, o nemətdən dadmaq çox çətindir. Gərək birinci növbədə başa düşəsən, hiss edəsən, gərək... xalqın, vətənin, millətin dərdinə qalsınlar.
Arzum odur ki, məhəbbəti yaşatsınlar, vətənin qədrini bilsinlər, etibar edilənlər etibarlarını itirməsinlər. Etibarı itirənlər bizi bu ağır günlərə saldılar. Tamah, nəfs üstündə olur hər şey, “mənim olsun” fikrindən imtina etsinlər. İnsanlara sözünü mehrlə deyirsən, mehri eşitmir, şeirlə deyirsən, şeiri eşitmir, sehrlə deyirsən sehri eşitmir, xeyrinə deyirsən, xeyri eşitmir. Eşidilmək istəyirəm. İstər dövlət dövlət kimi, istərsə də insan insan kimi eşitsin hamını...”
#musayaqub #birgunahseninbirgunahmenim #huznvalsi #aqsinelizade #reqibler #biraddimla #biraddimlayol