٩ خطوات للانتصار على النرجسي وهزيمته هزيمة منكرة - استردي نفسك من النرجسي

بعيدا عن النرجسي
الحلقة النهاردة عنك انتي ولكي وبعيدا عن النرجسي لكن في صميم الحرب معاه
حلقة النهاردة تعتبر خطوة من خطوات الانتصار على النرجسي وهزيمته هزيمة منكرة
النهاردة حنتكلم عنك ، عن تقديرك لنفسك ، واحترامك لذاتك ،ودة اللي النرجسي كان هدفه تدميره من اول يوم قرر يمتلكك فيه ، لان تقديرك لنفسك لو قوي النرجسي ابدا مش حيعرف يستغلك ولا يتلاعب بيكي
يعني دلوقتي انا مثلا او انتي او أي حد عمل اختبار الذكاء اللي هو الاي كيو ونتيجة الاختبار عالية ومستوى ذكائه مرتفع فهو كدة متأكد انه ذكي جدا وفاهم دة كويس وكمان بيحس بيه في مذاكرته او في عمله يعني كونه ذكي دة بالنسبة له زي بالظبط انه عارف ومتأكد ان الشمس بتشرق من الشرق ، تفتكري حد بالوصف دة ممكن حد ييجي يتلاعب بيه ويحاول يوهمه انه غبي؟ طبعا مستحيل مهما كان المتلاعب دة ذكي مش حيقدر يغير اعتقادك الراسخ بنفسك الا اذا انتي فتحتي له السكة ، ازاي فتحتي له السكة ، يعني قررتي تثقي فيه اكتر من نفسك ودي اكبر وأول غلطة بتقعي فيها لما بتدخلي في علاقة مع النرجسي ، طيب النهاردة فهمتي خلاص انه نرجسي وانه متلاعب يعني مش مفروض تفتحي له السكة تاني ، المهم انا اخترت موضوع الذكاء لانه محسوم باختبار وانتي متأكدة منه ومعاكي شهادة بتقول انك ذكية ومع ذلك اذا وثقتي في حد ممكن يغير مفهومك ويشككك أصلا في اللي اخترع الاختبار دة ، لكن دة بيحصل مع الوقت مش في يوم واتنين لا بيحصل في شهور وسنين انتي بتكوني فيهم منيمة عقلك وفاقدة مهارة التفكير تماما وبتستخدمي مشاعرك بس ودي بتكون تاني غلطة بتغلطيها وهو بيثبتها دايما بإنه يقولك انتي مش محتاجة تفكري في حاجة انا مسئول البي لك طلباتك كلها ، انتي متتعبيش دماغك ، ولو فكرتي لازم يقنعك ان تفكيرك غلط وان انتي مينفعش تفكري خليه هو يفكر لك عشان انتي مبتعرفيش تفكري صح ، وبالتالي انتي بتعطلي مخك تماما وبكدة مبتفكريش هل كلامه صح ولا غلط ، هل انتي فعلا غبية زي مابيقول ولا انتي أصلا اذكى منه ، انتي بتنيمي عقلك وتسترخي وتستسهلي وانتي ذاتك بتموت موت بطيء وانتي مش مدركة لكدة .
كل دة كلام عن النرجسي وانا أصلا كنت ناوية أتكلم عنك انتي بس ، النهاردة عايزة اعلمك ازاي تقفلي السكة اللي انتي فتحتيها من عشر او ١٥ او ٢٠ او ٣٠ سنة ، تقفلي حنفية الثقة دة لو مكنتيش لسة قفلتيها وعايزة اعلمك ازاي تقدري تعرفي قيمة نفسك وتحترمي ذاتك عشان تقدري تبني حدود قوية النرجسي ميقدرش يخترقها
١- اول خطوة ممكن تكون صدمة لكي بس لازم تعمليها مهما كانت صعبة ولو تعمليها بالتدريج ، انك تاخدي المسئولية الكاملة عن حياتك ، عن شخصك انتي وعن قراراتك بما فيها اختيارك للنرجسي كزوج وبما فيها تأثيرك على اولادك نتيجة معاناتك مع النرجسي ، عن شغلك ، عن عقلك اللي اختارتي توقفيه ومفروض ترجعيه يشتغل تاني ، وعن مشاعرك وعواطفك اللي ماشية توزعيها بدون حساب على اللي يستحق واللي مايستحقش ، عن خطواتك تجاه التعافي من ادمان النرجسي ومن العلاقة السامة والحياة الصعبة اللي عيشتيها . شيلي المسئولية وكوني ادها عشان تحسي انك قوية وانك مستقلة حتى لو كنتي تحت سلطته لو شيلتي المسئولية حتقدري توزني الدنيا وحتحترمي نفسك لانك لما بتشوفي حد ادالمسئولية ومستقل ومسئول عن نفسه بتحترميه وبتقدريه
٢- الخطوة التانية مهمة جدا ، كوني امينة مع نفسك وعامليها على انها شخص محترم مش طفل صغير بتضحكي عليه وتقولي له حجيب لك حاجة حلوة ومتجيبيش عارفة ليه مش بتجيبي عشان بتنسي وليه بتنسي عشان هو مش في بؤرة اهتمامك عشان النرجسي مستحوذ على كل تفكيرك ، انتي بتعاملي نفسك بنفس الأسلوب بتوعدي نفسك ومش بتنفذي ، بتوعديها بالتغيير ومبتشتغليش ولا تبذلي المجهود الكافي عشان تغيريها ، بتوعديها انك حتلعبي رياضة عشان تحافظي عليها ومتوفيش بوعدك يادوب يومين وتوقفي ، بتوعديها انك تقرأي عشان تثقفيها وتعلميها وتحميها وللأسف بتكسلي وبتنسي ، عارفة ليه عشان النرجسي مستحوذ على تفكيرك ومشاعرك وانتي مش فاضية لحد غيره (على فكرة ممكن يكون أي حد ومش نرجسي وانتي تتنازلي له كدة عن نفسك برضه لو انتي ضعيفة جدا واعتمادية ) ، لازم تكوني صادقة وامينة مع نفسك ، شوفي انتي لما حد بيوعدك ويوفي انتيب تثقي فيه اد ايه ؟ مش عايزة تثقي في نفسك؟
٣- اوجدي معنى وسبب لحياتك (غير انك تدوري في فلك النرجسي ) انتيب تعملي ايه في الحياة ؟ انتي بتفيدي مين او انتي بتضيفي ايه لأي حد ولو حتى لنفسك ؟ انتي بعد عمر طويل لما الناس تفتكرك حتقول الله يرحمها كانت ايه؟ كانت طيبة وضعيفة وتعبانة في حياتها ولا الله يرحمها كانت بتساعد الناس وبتشتغل في جمعيات خيرية او كانت بتنشر العلم او كانت بتعلم أجيال ، او كانت بتربي أجيال ؟ تفتكري الناس حتقول ايه ، ايه الأثر اللي انتي عايزة تسيبيه في الدنيا ، لو عندك هدف لحياتك وعندك حاجة نفسك تحققيها حتلاقي نفسك حبيتي حياتك ، حتلاقي نفسك بتصحي من النوم مبسوطة انك صحيتي مش بتقولي في نفسك يارب ليه ما اخدتنيش ، خلي عندك سبب تعيشي عشانه هدف ولو كان صغير ، مثلا قرري تحفظي اولادك القرآن ، طيب لازم تتعلمي تحفظي ، ادخلي دورات تحفيظ اونلاين ، قرري تعلمي الستات حاجة تنفعهم واتعلميها وعلميها ، خلي عندك هدف ولو صغير حيحسسك انك بتعملي حاجة مهمة يعني انتي مهمة ولكي قيمة
٠٠٠٠ الباقي في اول تعليق
اكونت الفيس بوك
www.facebook.c...
جروب ادرس عدوك النرجسي
/ kawthersanad11