Рет қаралды 71,094
अंधश्रद्धा निर्मूलन समितीची देव आणि धर्माबद्दलची भूमिका या विषयाला सुरुवात करतोय. महाराष्ट्रामध्ये दोन्ही बाजूने हा प्रश्न सतत विचारला जातो. अंधश्रद्धा निर्मूलन समितीची भूमिका ही देव आणि धर्म यांच्याबद्दल तटस्थतेची आहे. समितीच्या व्यासपीठावरून जाहीर कार्यक्रमामध्ये देव आहे का नाही आणि देव मानावा किंवा न मानावा त्यांच्याबद्दल समिती काहीही सांगत नाही. अंधश्रद्धा निर्मूलनाच्याबद्दल ते कशासाठी आहे हे सांगताना आम्ही असं सांगतो की, 'अंधश्रद्धा निर्मूलनाचे आमच्या दृष्टीने चार महत्वाचे भाग आहेत. पहिली गोष्ट म्हणजे शोषण करणाऱ्या, फसवणूक करणाऱ्या दिशाभूल करणाऱ्या अंधश्रद्धांना विरोध करणं. दुसरी गोष्ट म्हणजे वैज्ञानिक दृष्टिकोनाचा प्रसार करणं. तिसरी गोष्ट म्हणजे विधायक, कठोर आणि कृतिशील धर्मचिकित्सा करणं आणि चौथी गोष्ट म्हणजे विवेकाच्या आधारे स्वतः नीतीनं वागणं. या चार गोष्टींसाठी अंधश्रद्धा निर्मूलनाची चळवळ चालते. आणि या चार गोष्टी करीत असताना आम्हाला देव आणि धर्म कुठंही आडवे येत नाहीत. म्हणून देव आणि धर्म यांच्याबद्दलची आमची भूमिका ही तटस्थतेची आहे.
- डॉ. नरेंद्र दाभोलकर (श्रद्धा-अंधश्रद्धा या पुस्तकातून)