TINGĦATA L-AĦĦAR TISLIMA NICOLETTE GHIRXI

ONE.COM.MT • Dalgħodu sar il-funeral ta’ Nicolette Ghirxi, fejn dawk l-aktar qrib tagħha tawha l-aħħar tislima wara li nhar it-Tnejn li għadda allegatament inqatlet kiesaħ u biered minn Irlandiż ta’ 50 sena u li aktar tard irriżulta li huwa l-eks sieħeb tagħha.
KITBA: STEFAN BAJADA
FILMATI: DORIAN BORG
Fis-Santwarju tal-Ħniena Divina fin-Naxxar ingħatat l-aħħar tislima lil Nicolette Ghirxi, il-vittma tat-tielet qtil li seħħ f’pajjiżna din is-sena.
Il-mara Maltija ta’ 48 sena nqatlet nhar it-Tnejn li għadda f’appartament fis-Swatar, mill-eks sieħeb tagħha, l-Irlandiż Edward William Johnston ta’ 50 sena.
Il-Knisja kienet ippakjata bi qraba u ħbieb li kienu jafu mill-qrib lill-vittma.
L-allegat aggressur kien spiċċa nqatel wara li ma riedx iċedi u jitlaq minn idu dik li dehret arma tan-nar, waqt li hedded u pprova jaggredixxi lill-uffiċjali li ċċirkodawh.
Kif żvelat minn ONE News, Garaxx komuni fil-blokka ta’ appartamenti fi Triq Maestro Giuseppe Busuttil fis-Swatar, fejn inqatlet Ghirxi, seta’ kien il-post fejn l-eks sieħeb tagħha, inħeba ftit qabel u qagħad jistenniha tasal.
Ftit tal-jiem ilu l-awtopsja wriet kif il-vittma nqatlet b’diversi daqqiet ta’ sikkina f’għonqha.
Sadanittant, l-aħbar tal-qtil ta’ Nicolette Ghirxi ġibdet l-attenzjoni tal-midja internazzjonali, fosthom dik Irlandiża, li rrapportat il-każ fid-dettal fl-aħħar jiem.
Fl-aħħar snin, anke permezz ta’ profili foloz fuq il-midja soċjali, l-allegat aggressur kien daħal fis-suq tal-bejgħ tal-ishma onlajn. Profili simili kienu ntużaw ukoll biex jiffastidjaw lill-istess vittma Maltija, tant li kienet irrapportathom mat-taqsima tal-vjolenza domestika lokali, iżda xtaqet li ma jitkompliex il-proċess fil-każ.