Kithul Treacle to Kithul Jaggery | කිතුල් පැණි වලින් හකුරු හදන විදිහ හොයාගෙන කිතුල් වාඩියකට | 4K

සුදු මාමා විසින් හොදින් පිරිසිදු කරගත් තාච්චියකට අපත් සමග කලු මාමා රැගෙන පැමිනි කිතුල් පැණි වලින් කොටසක් දමා ගත්තේ මාගේ ද උදව්වෙනි. කිතුල් පැණි තවත් වතාවකට පෙරා ගැනීම මෙහිදී සිදු කරයි. සුදු මාමා විසින් මැටියෙන්ම සැකසූ කුඩා ලිපක තැබූ පැණි පිරවූ තාච්චිය මද ගින්නේ රත් වෙන්නට තබා "පුතේ මේක මෙහෙම ටික වෙලාවක් රත් වෙන්න ඕනේ.... ටික වෙලාවක් ගිහින් තමා හැදි ගාන්න පටන් ගන්නේ...." කියමින් එතෙක් පැවති නිහඩ තාවය බිද හෙලීය. "මේවා හදන්නේ හරියට අපේ දරුවෙක්ට කෑමක් හදනවා වගේ... සීනි ඇටයක් දාන්නේ නෑ..." සුදු මාමා සුසුමක් හෙලුවේ ලිපෙන් නොකඩවා එන දුම් අතරින් පොල්කටු හැන්ද පැණි තාච්චිය වෙත යොමු කරවමිනි.
"දැන් පැය කාලක් , හමාරක් හැදි ගාන්න ඕන පදම එනකම්.." සුදු මාමා විස්තර කියමින් පැණි තාච්චිය හැදි ගාන අතරවාරයේ " ඔන්න පුතේ ඔය පොල් කටු ටික ලං කොරන්න.." "ඉසන්ක පුතේ.... කෙහෙල් කොලයක් ගේමු නේද..? " සැබැවින්ම අපට කිරිමට ඇත්තේ නිසොල්මනේ බලා සිටීම පමනකි. වාඩිය පුරා දුම් පිරී වහලයේ උලු අතරින් ඒ දුම් ඉහලට ගලා යයි. දුම් වැදුනු ඇස් කෙලවරේ තෙත් වන කදුලු බිංදු පිස දමමින් සුදු මාමා පැණි තාච්චිය හැදි ගාමින් වරින් වර හැන්ද උස්සා පදම සරි වී ඇත්දැයි සොයා බලයි.
පැය බාගයකට ආසන්න කාලයක් සිදු කල රාජකාරිය අවසන් කල සුදු මාමා "පුතේ කෙහෙල් කොලේ එලලා අපි ඒක උඩ පොල්කටු ටික තියමු... දෙපැත්තෙන් අර ලී දෙක තියමු." පිළිවෙලකට සහ පේලියකට තැබූ පොල්කටු තුලට පොල්කටු හැන්දෙන්ම යම් තරමකට ඝණ වී තිබූ කිතුල් පැනි හනි හනිකට වක් කර ගත්තේ එම රාජකාරියට සුදු මාමා කෙතරම් ප්‍රවීණයෙකු දැයි සාක්ෂි සාධක සපයමිනුයි.
ඉනික්බිතිව වාඩිය ඉදිරිපස බංකුවට බර වී පැයක පමන කාලයක් ආ ගිය තොරතුරු සහ ගල් ලෙනේ තොරතුරු පිළිබදව දොඩමලු වූ අතර ඉන් පසු නැවතත් විපරම් කොට බැලුවේ පොල්කටු වලට පුරවණ ලද කිතුල් පැණි හකුරු වී ඇත්දැයි යන වගයි. සැබැවින්ම මේ නම් පුදුමයකි. කිසිදු රසායනික ද්‍රවයකින් තොරව ඇස් පනාපිටම මෙබදු රසවත් කෑමක් සෑදීම මා හට නම් සැබැවින්ම පුදුමයකි. පොල්කටු වලින් ගලවාගත් කිතුල් හකුරු බෑයකින් කැබැල්ලක් කඩාගෙන සුදු මාමා මා හට ලබා දුන්නේ "මේං පුතේ පුතාලගේ මහන්සියේ අවසානයේ හැදෙන රසවත්ම කෑමෙන් කොටසක්.." යනුවෙන් කියමිනි.
The second part of the story and the most exciting part. This video will show how we convert Kithul Treacle to Kithul Jaggery. It’s incredible how much effort these villagers put into making the end product Kithul Jaggery. My heartful gratitude to Kalu Mama, the main character of this vlog, and to two brothers and all the other villagers who helped us and their incredible hospitality. I hope you will enjoy the video.
Greetings
I am Dinesh